कांग्रेस केन्द्रीय समिति बैठक- स्थानीय निर्वाचनको समीक्षा गर्दै गठबन्धनलाई कसरी अगाडि बढाउने निर्णय गर्ने

नेपाली कांग्रेसका प्रवक्ता डा. प्रकाशशरण महतले केन्द्रीय समिति बैठकले गठबन्धन र पार्टीलाई कसरी अगाडि बढाउने भनेर निष्कर्ष निकाल्ने बताएका छन् । 

सोमवारबाट केन्द्रीय कार्यालय सानेपामा शुरू भएको बैठकबारे जानकारी दिँदै उनले स्थानीय निर्वाचनको समीक्षाका आधारमा कमीकमजोरीहरूलाई केलाउने र गठबन्धन एवं पार्टीलाई कसरी अगाडि बढाउने भन्ने निष्कर्ष निकाल्ने बताएका हुन् । 

‘बैठकको मूल उद्देश्य भनेको शुभेच्छुक, भ्रातृ संगठनलाई गति दिन सबै क्षेत्रलाई समेटेर संगठन निर्माण गर्ने भन्ने हो, त्यसका लागि प्रस्ताव गएको छ, त्यो अगाडि बढ्छ,’ उनले भने, ‘निर्वाचन समीक्षाको आधारमा के कमी कमजोरी भयो, गठबन्धनमा कहाँ कमजोरी भयो भन्ने विषयमा छलफल हुन्छ । त्यसपछि गठबन्धन र पार्टीलाई कसरी अगाडि बढाउने भन्ने निष्कर्ष निकाल्छौँ ।’

साथै उनले पार्टी अब निर्वाचन केन्द्रित भएर अगाडि बढ्ने बताए । ‘पार्टी पूर्णरुपमा क्रियाशील हुन्छ, सोहीअनुसार निर्वाचन परिचालन अभियान अगाडि बढ्छ,’ उनले भने । 

सोमवारको बैठकमा दुई वटा प्रतिवेदन पेश भएका छन् । निर्वाचन परिचालन समिति संयोजक उपसभापति पूर्णबहादुर खड्का र प्रचार समितिको संयोजकसमेत रहेका प्रवक्ता महतले आ-आफ्नो समितिको प्रतिवेदन पेश गरेका हुन् । सो प्रतिवेदनमाथि केन्द्रीय सदस्यहरूले धारणा राख्नेछन् । अहिले पार्टीका सातै प्रदेशका प्रमुखहरूले आ–आफ्नो धारणा राखिरहेका छन् । 

बैठकमा केन्द्रीय सदस्यहरूले पनि सल्लाह सुझाव राख्नेछन् । सोही आधारमा सशक्त ढंगले पार्टीलाई अगाडि बढाउने प्रवक्ता महतले बताए ।