नेपाल राष्ट्र बैंकका गभर्नर महाप्रसाद अधिकारीको सम्बन्धमा प्रश्न उठेको भन्दै एक सांसदले प्रधानमन्त्री शेरबहादुर देउवाले संसदमा जवाफ दिनुपर्ने बताएका छन् ।

बुधवार प्रतिनिधिसभा बैठकमा नेमकिपा सांसद प्रेम सुवालले गभर्नरमाथि प्रश्न उठिसकेको भन्दै अर्थ मन्त्रालय समेत सम्हालेका प्रधानमन्त्री देउवाले जवाफ दिनुपर्ने बताएका हुन् ।

‘गभर्नर महाप्रसाद अधिकारीबारे संसदमा प्रश्न उठेको हुँदा अर्थ मन्त्रालयको समेत जिम्मेवारी सम्हालेका प्रधानमन्त्रीले संसदमा स्पष्ट गर्न जरुरी छ,’ सांसद सुवालले औषधि तेस्रो संशोधन विधेयक माथिको छलफलका क्रममा भने, ‘यसका लागि सभामुखले रुलिङ गर्न जरुरी छ ।’

त्यसअघि प्रतिनिधिसभा बैठकमा सभामुखसँग समय लिएर र शून्य समयमा सांसदहरूले गभर्नर अधिकारीमाथि छानबिनको माग गरेका थिए । नेपाली कांग्रेसका मीनबहादुर विश्वकर्मा, माओवादीकी रेखा शर्मा, अमृता थापा लगायतले नेकपा एमालेको अर्थ र योजना विभागका सदस्य रहेका गभर्नर ‘एम अधिकारी’माथि छानबिन गर्नुपर्ने बताएका थिए ।