नेकपा एमालेका नेता भीम रावलले मन्त्रिपरिषद्बाट निर्णय गराएर पनि अमेरिकी राज्य साझेदारी कार्यक्रम (एसपीपी)बारे अमेरिकासँग पत्राचार गर्न प्रधानमन्त्री शेरबहादुर देउवाको दोहोरो चरित्र रहेको आरोप लगाएका छन् । 

बिहीवार बसेको प्रतिनिधिसभा बैठकको विशेष समयमा रावलले मन्त्रिपरिषद्बाट निर्णय गराएजस्तो गर्ने र अमेरिकालाई पत्राचार नगर्न देउवाले नै इसारा गरेको आरोप लगाएका हुन् । 

‘मन्त्रिपरिषद् निर्णय तत्काल कार्यान्वयन नगरी थप अध्ययन गरेर पत्राचार गर्ने भन्ने परराष्ट्रको भनाइ आपत्तिजनक छ । परराष्ट्र मन्त्रालयलाई मन्त्रिपरिषद्बाट निर्णय होइन अरू कसैको चाहनाबाट चलाउन खोजिएको हो ?’ रावलले भने, ‘संसदीय समिति र मन्त्रिपरिषद्को निर्णय कार्यान्वयन नगर्ने परराष्ट्र मन्त्रालयको निर्णयले कतै प्रधानमन्त्री शेरबहादुर देउवाले दबाब छल्नको लागि मन्त्रिपरिषद्बाट निर्णय गराएजस्तो गर्ने तर पत्र नपठाउन साउती त गर्नुभएको छैन भन्ने आशंका सरकारले निर्णय गरेको ३३ दिनसम्म पनि अमेरिकालाई पत्र नपठाएबाट उत्पन्न हुँदैन र ?’

गत असार ६ गते बसेको मन्त्रिपरिषद् बैठकले एसपीपी अस्वीकार गर्ने निर्णय गरेको थियो । तर ३३ दिनसम्म पत्राचार नगरिएको भन्दै संसदमा विरोध भइरहेको छ । यही विषयमा सरकारलाई रुलिङ गर्न माग गर्दै रावलले बुधवार प्रतिनिधिसभाको रोष्ट्रम कब्जा गरेका थिए ।