सरकारले सन् २०२३–२०३३ लाई नेपाल भ्रमण दशक घोषणा गर्ने भएको छ । संस्कृति, पर्यटन तथा नागरिक उड्डयन मन्त्रालयले आइतवार सार्वजनिक गरेको पर्यटन पुनरुत्थान कार्ययोजनामा नेपाल भ्रमण दशक घोषणा गर्ने उल्लेख गरिएको छ । कार्ययोजनामा उक्त घोषणा आगामी तीन महिनाभित्र गरिसक्ने उल्लेख गरिएको छ । 

यसअघि सरकारले सन् २०२० मा नेपाल भ्रमण वर्ष घोषणा गरेको थियो । तर, उक्त कार्यक्रम विश्वव्यापी फैलिएको कोरोना महामारीका कारण प्रभावित भएको थियो । 

मन्त्रालयले गैरआवासीय नेपाली संघको नेतृत्वमा ‘एक नेपाली एक विदेशी साथी नेपाल पठाऊ अभियान’समेत चलाउने भएको छ । यो कार्यक्रम अन्तर्गत विदेशमा रहेको प्रत्येक नेपालीले कम्तीमा एकजना विदेशी साथीलाई नेपाल घुम्न आउनका लागि प्रेरित गर्नुपर्नेछ । यसबाट नेपालको पर्यटन क्षेत्रको प्रबर्द्धनमा ठूलो सहयोग पुग्ने मन्त्रालयले विश्वास लिएको छ । 

कोरोना महामारीका कारण नेपालको पर्यटन क्षेत्र नराम्ररी प्रभावित भएको छ । पर्यटन क्षेत्र प्रभावित हुँदा नेपालको अर्थतन्त्रमा नकारात्मक प्रभाव परिरहेको छ ।