नेपाली कांग्रेसकी केन्द्रीय सदस्य एवं प्रधानमन्त्री शेरबहादुर देउवापत्नी डा. आरजु देउवा स्वदेश फर्किएकी छन् ।

भारतको राजधानी नयाँदिल्लीमा उपचार सकेर आरजु आइतवार काठमाडौं फर्केकी हुन् ।

भारतका लागि नेपाली राजदूत डा. शंकर शर्माले आरजु सहितको फोटो राख्दै स्वदेश फर्केको जानकारी गराएका हुन् ।

दिल्लीको म्याक्स अस्पतालमा उनको उपचार भएको थियो । उपचारको सिलसिलामा भारत गएकी आरजुले त्यहाँ राजनीतिक दलका नेताहरूसँग पनि छलफल गरेकी थिइन् ।

आरजु दिल्लीमै रहेको समयमा माओवादी केन्द्रका अध्यक्ष पुष्पकमल दाहाल ‘प्रचण्ड’ले दिल्लीको भ्रमण गरेका थिए । 

भारतमा प्रचण्ड र आरजुबीच चुनावपछिको ‘पावर शेयरिङ’बारे छलफल भएको भन्दै नेपालमा चर्चा भएको थियो । त्यस्तो आरोपको प्रचण्डले खण्डन गरिसकेका छन् ।