टुर्कियेका पाँचवटा बैंकहरूले रुसको मिर पेमेन्ट सिस्टममा कारोबार गर्ने टर्कीका राष्ट्रपति रेचेप तैयिप एर्दोआनले बताएका छन् । 

रुसका राष्ट्रपति भ्लादिमिर पुटिनसँग कृष्ण सागरको तटमा रहेको सोची शहरमा कुराकानी गरी फर्केलगत्तै एर्दोआनले यो घोषणा गरेका हुन् । 

यस कदमले रुसी पर्यटक तथा टुर्किये दुवैलाई राहत दिने एर्दोआनको भनाइ छ । 

रुसी मुद्रा रुबलमा भुक्तानी गर्दा रुस र टुर्किये दुवैलाई आर्थिक सहायता मिल्ने पनि एर्दोआनको भनाइ छ । पुटिनसँग एर्दोआनको वार्तामा दुई देशका केन्द्रीय बैंकका गभर्नरहरू पनि उपस्थित थिए । 

प्राकृतिक ग्यासको आपूर्तिका लागि रुबलमा कारोबार गर्ने सहमति पनि पुटिन र एर्दोआनले गरेका छन् । 

रुसले युक्रेनमाथि गरेको आक्रमणलाई टर्कीले विरोध गरेको भए पनि अमेरिका र युरोपले जस्तो गरी टुर्कियेले रुसमाथि प्रतिबन्ध लगाएको छैन । 

उसले रुसबाट ऊर्जा आयात पनि जारी राखेको छ । गत वर्ष टुर्कियेले गरेको तेल आयातको एक चौथाइ तथा प्राकृतिक ग्यासको ४५ प्रतिशत रुसबाटै आएको थियो ।