कालोबजारीयासँग साठगाँठ गरेर बजार अनुगमन नगरेको भन्दै एक सांसदले उद्योग वाणिज्य तथा आपूर्तिमन्त्री दिलेन्द्र बडूको राजीनामा माग गरेका छन् । 

आइतवार बसेको प्रतिनिधि सभा बैठकको विशेष समयमा नेमकिपा सांसद प्रेम सुवालले सरकार नालायक बन्दा जनतामाथि अत्याचार बढेको आरोप लगाएका हुन् । 

‘उपभोग्य वस्तु दाल, तेल लगायत खाद्यान्नमा मिसावट भएको उपभोक्ताको गुनासो छ । उद्योगलाई नियमन गर्नुपर्ने जिम्मा पाएका मन्त्रीसँग गलत मान्छेको साँठगाँठ छ’ सुवालले भने, ‘मन्त्रीको दबाबका कारण असल कर्मचारीले पनि बजार अनुगमन गर्न पाएका छैनन् । मन्त्रीमाथि छानबिन हुनुपर्छ, उनलाई बर्खास्तीको माग गर्छु ।’ 

सांसदले नेकपा माओवादीका अध्यक्ष पुष्पकमल दाहाल प्रचण्डका घरबेटी ठेकेदार सारदाप्रसाद अधिकारीको सैलुङ कन्स्ट्रक्सनले ७ वर्षदेखि अलपत्र पारेको सडक निर्माणको लागि सरकारको ध्यानाकर्षण गराए ।