नयाँवर्षको अवसरमा गत वैशाखमा साउथको ठूलो बजेटको चलचित्र ‘केजीएफ २’सँग नेपाली चलचित्र ‘ए मेरो हजुर ४’ प्रदर्शनमा आएको थियो । उक्त समय साउथ चलचित्रसँग भिड्ने आँट गर्दा निर्देशक झरना थापाले कसैबाट साथ, सहयोग र समर्थन नपाएको गुनासो गरेकी थिइन् ।

उनले भनेकी थिइन्, ‘ए मेरो हजुर ४’ प्रदर्शनको पूर्वसन्ध्यामा उनले भनेकी थिइन्, ‘अहिले हामी विदेशी चलचित्रसँग एक्लै लड्नु परेको छ, भोलि तपाईंले पनि लड्नु पर्ने नै छ । बूढी मरी भन्दा पनि काल पल्किएको हेक्का राख्नु हुन मेरो विनम्र अनुरोध छ । चलचित्रकर्मी मित्रहरू, आज हामीलाई झम्टिने चितुवाले भोलि तपाईंलाई बाँकी राख्छ त ? यो तथ्यलाई विचार गर्नुहोला ।’

उनले भनेजस्तै यतिबेला विदेशी चलचित्रको मारमा शुक्रवारदेखि प्रदर्शनमा आएको दुई नेपाली चलचित्र ‘प्रकाश’ र ‘राधा’ परेका छन् । प्रदर्शनको पहिलो दिन शुक्रवार प्रदर्शकहरूले बलिउड चलचित्र ‘लाइगर’लाई उच्च शो दिँदा नेपाली चलचित्रहरू न्यून शोमा खुम्चिनुपरेको थियो । 

शो राम्रो नपाएको भन्दै चलचित्र ‘प्रकाश’ टिम आक्रोशित नै बन्यो । ‘प्रकाश’का अभिनेता प्रदीप खड्का, निर्माता महेन्द्र अधिकारी र लेखक विकास सुवेदीले पत्रकार सम्मेलनको आयोजना गरेरै असन्तुष्टि पोखे । तर, उनीहरूको पक्षमा एकाध चलचित्रकर्मीहरू मात्र बोल्न अघि सरेको देखियो ।

अहिले ‘प्रकाश’ र ‘प्रकाश’ विदेशी चलचित्रको चपेटामा परेपछि निर्देशक एवं अभिनेत्री झरना थापाले आफूलाई पर्दा मात्रै हारगुहार गर्ने स्वार्थीपन त्याग्न चलचित्रकर्मीहरूमा अनुरोध गरेकी छन् । उनले नेपाली चलचित्रमाथिको आक्रमणको प्रतिकारमा सबै एक हुनुपर्ने बताएकी छन् । झरनाले फेसबुकमा लेखेकी छन्–​

‘हिजो हामी (ए मेरो हजुर–४) लाई झम्टेको चितुवा (विदेशी फिल्म) ले आज ‘प्रकाश’ र ‘राधा’लाई पनि बाँकी राखेन । त्यतिबेला हामीले त्यो चितुवाको एक्लै प्रतिकार गर्नु परेको थियो । आखिर यस्तो एकल लडाइँ  कहिलेसम्म ? जसलाई पर्छ, ऊ मात्रै चिच्याउनु पर्दाको आघात हामीले रामैसँग भोगेका छौँ । त्यसमाथि हामी एकअर्कासँग नै लड्ने गरेका छौँ । ‘लालसिंह चड्डा’लाई एक्लै छोडिदियौँ । अर्को हप्ता भने तीन–तीन वटा नेपाली फिल्म आपसमा भिड्यौँ । एक–अर्काको अस्तित्व स्वीकार नगर्ने, अरुको पीडामा कहिल्यै नबोल्ने, आफूलाई पर्दा मात्रै हारगुहार गर्ने हाम्रो स्वार्थीपना आजकै दिनबाट निर्मूल गरेर नेपाली फिल्ममाथिको आक्रमणको प्रतिकारमा हामी सबै एक हुनुपर्छ । हिजो हामीलाई चिथोरेको चितुवाले आज गर्दन नै समातेको छ । यस्तै भइरहे, भोलि पूरै इन्ड्रस्टी नै निल्ने छ । चेतना भया, जय नेपाल÷जय नेपाली चलचित्र ।’