महाभियोग सिफारिस समितिले प्रधानन्यायाधीश चोलेन्द्रशमशेर जबरासँगको बयानको भिडियो रेकर्ड राख्ने भएको छ । भिडियो रेकर्डका लागि कर्मचारी नआउँदा समितिको बैठक बिहीवार १२ बजेसम्म शुरु हुन सकेको छैन । 

प्रधानन्यायाधीशसँगको बयान संसद्का लागि दुर्लभ परिघटना भएकोले यसको भिडियो रेकर्ड राख्न लागिएको सचिवाल स्रोतले लोकान्तरलाई जानकारी दियो । यसअघि संसदीय समिति बैठकको अडियो रेकर्ड राखे पनि भिडियो रेकर्ड गर्ने गरिएको थिएन ।

बयानका लागि चोलेन्द्र बिहान ११ बजे नै संसद सचिवालय पुगेका थिए । उनी अहिले संसद्का महासचिवको कार्यकक्षमा बसिरहेका छन् । समितिका जेष्ठ सदस्य कांग्रेस सांसद रामबहादुर विष्ट सभापति रहेको समितिमा चोलेन्द्रले आफूमाथि लागेको आरोपबारे जवाफ दिन लागेका हुन् ।