प्रमुख प्रतिपक्षी दल नेकपा एमालेले प्रतिनिधि सभाको कार्यकाल लम्ब्याउने विधेयक फिर्ता नलिए संसद छाड्ने धम्की दिएको छ । सरकारले प्रतिनिधि सभामा पेश गरेको केही नेपाल ऐन संशोधन गर्ने विधेयकमाथि संशोधन प्रस्ताव राख्दै एमाले सांसदहरूले प्रतिनिधि सभाको कार्यकाल थप गर्ने विधेयक पारित गर्न नमिल्ने बताएका हुन् । 

संशोधन पेश गर्दै पूर्वकानूनमन्त्री समेत रहेका स्थायी कमिटी सदस्य शेरबहादुर तामाङले असोज २ गतेभन्दा पर यो संसद् लैजान नमिल्ने बताएका हु्न् । ‘अहिले कानूनमन्त्रीले फिर्ता लिएँ भन्नु भएन भने त्यसपछिको परिस्थिति व्यहोर्नु पर्ने हुन्छ । हामी वाच टाइगर हौँ, लोकतन्त्रको इको सिष्टम बिगार्ला भनेर बसेका छौँ । हामी यहाँबाट निस्कनु पर्ने हुनसक्छ’, तामाङले भने, ‘अर्को संसद आएर बस्नेगरी भनेर ल्याउन मिल्छ ? संसद कोमामा गइसक्नु पर्ने होइन ? असोज २ भन्दा पर लाग्न मिल्दैन संसदको कार्यकाल सम्बन्धी विधेयक फिर्ता लिइयोस् ।’

एमालेकै अर्का नेता गोकुल बाँस्कोटाले असोज १ गते सबैको म्याद समाप्त हुने बताए । ‘निर्वाचनको प्रक्रिया शुरु भएपछि संसदको आयु लम्ब्याउन मिल्छ ? गठबन्धनले के षडयन्त्र गर्दै हुनुहुन्छ ?’, बाँस्कोटाले भने, ‘असोज १ गते प्रतिनिधि सभा र प्रदेश सभाको कार्यकाल सकिन्छ ।’ 

त्यसअघि कानूनमन्त्री गोविन्द कोइरालाले केही नेपाल ऐन संशोधन गर्ने विधेयकमाथि दफावार छलफलका लागि प्रस्ताव पेश गरेका थिए ।