अहिलेसम्म प्राप्त प्रमाणकै आधारमा महाभियोग लगाउन सकिन्छः कल्याणी खड्का

नेकपा एकीकृत समाजवादीकी सांसद कल्याणी खड्काले अहिलेसम्म प्राप्त प्रमाणकै आधारमा चोलेन्द्रशमशेर जबरालाई महाभियोग लगाउन सकिने बताएकी छन् । प्रतिनिधि सभाको महाभियोग सिफारिस समितिको बैठकमा बोल्दै उनले थप प्रमाण जुटाउन सकेको भए राम्रो हुने भए पनि अहिलेसम्म प्राप्त प्रमाणकै आधारमा पनि महाभियोग लगाउन सकिने दाबी गरिन् । 

खड्काले जबराले बयानमै कानूनविपरीत सर्वोच्च अदालतको भवन निर्माणका लागि ठेक्का लगाएको स्वीकार गरेको बताउँदै प्रधानन्यायाधीशलाई यसरी काम गर्ने कुनै अधिकार नभएको र त्यसलाई आधार मानेर पनि महाभियोग लगाउन सकिने बताइन् । उनले दबाबमा आएर राजनितिक प्रभावमा संसद् पुनर्स्थापनाको निर्णय गरेको भन्नु पनि न्यायालय स्वतन्त्र नरहेको पुष्टि हुने दाबी गरिन् । 

रन्जन कोइरालाको हकमा गरिएको फैसला, पर्साको छप्कैयास्थित पोखरी व्यक्तिको नाममा गरिएको फैसलाले पनि जबराले भ्रष्टाचार गरेको पुष्टि हुने खड्काको दाबी छ । ४० दिनसम्म अदालत चलाउन नसकेकाले उनी असक्षम रहेको पुष्टि हुने भन्दै खड्काले जबराले तास खेल्नु जुवा हो तर म्यारेज खेल्नु होइन भनेर फैसला गरेको बताइन् । यिनै आधारमा जबरालाई महाभियोगको सिफारिस गर्नुपर्ने खड्काको तर्क छ । 

बैठकमा एमाले सांसदहरूले भने अहिलेसम्म प्राप्त प्रमाणकै आधारमा जबरालाई महाभियोग लगाउन नसकिने बताएका छन् । सत्ता पक्षका सांसदहरूले भने अहिलेसम्म प्राप्त प्रमाणले महाभियोगको सिफारिस गर्न सकिने र पछि आउने संसद्ले थप प्रमाण जुटाएर यसलाई अगाडि बढाउन सक्ने मत राखेका छन् । तर, एमाले सांसदहरूले भने उक्त प्रस्तावमा फरक मत राख्ने अडान लिएका छन् ।