५ दलीय सत्ता गठबन्धनको एउटा घटक राष्ट्रिय जनमोर्चाले राष्ट्रपति विद्यादेवी भण्डारीको कदम विरुद्धको वक्तव्यमा हस्ताक्षर गर्न अस्वीकार गरेको छ ।

नागरिकता विधेयक प्रमाणीकरण नगरेर राष्ट्रपतिले गैरसंवैधानिक काम गरेको भन्दै गठबन्धनले बुधवार विज्ञप्ति प्रकाशित गरेको थियो । 

प्रधानमन्त्री एवं कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र जनता समाजवादी पार्टी (जसपा) नेपालका अध्यक्ष उपेन्द्र यादवले विज्ञप्तिमा हस्ताक्षर गरेका छन् ।

विगतमा विज्ञप्तिमा जनमोर्चाको तर्फबाट उपाध्यक्ष दुर्गा पौडेलले हस्ताक्षर गर्ने गरेकी थिइन् । ‘नागरिकता विधेयकमा उहाँहरूको शुरूदेखिकै फरक मत हो, संसदमा पनि विरोध गरेकाले आजको विज्ञप्तिमा हस्ताक्षर नगर्नु नौलो कुरा भएन,’ गठबन्धनमा आवद्ध दलका एक नेताले भने । 

बुधवारको विज्ञप्तिमा हस्ताक्षर नगरे पनि गठबन्धनमा कायम रहेको जनमोर्चाका नेताहरूले बताएका छन् । ५ दलीय गठबन्धनको तर्फबाट ४ नेताले हस्ताक्षर गरेको विज्ञप्तिमा राष्ट्रपतिको कदमविरुद्ध सचेत रहन गणतन्त्र पक्षधरलाई आह्वान गरिएको छ ।