गोकुल बास्कोटाको टिप्पणी – सरकार चलाउन सिकाउनेलाई देउवाले उल्टै तोरीको फूल देखाई दिए

नेकपा एमालेका केन्द्रीय सदस्य गोकुल बास्कोटाले नेपाली कांग्रेसका नेताहरूलाई ब्यंग्य कसेका छन् । एमाले अध्यक्ष केपी ओलीको नेतृत्वमा सरकार रहेका बेला ‘सरकार कसरी चलाउनुपर्छ हामी सिकाउँछौँ’ भनेर टिप्पणी गरेका कांग्रेस महामन्त्री गगन थापा, नेता मिनेन्द्र रिजाललगायतप्रति लक्षित गर्दै उनले देउवाले तोरीको फूल देखाइदिएको टिप्पणी गरेका हुन् । 

सामाजिक सञ्जालमा टिप्पणी लेख्दै उनले कांग्रेसको संस्थापनइतर पक्षका नेताहरूको विद्रोहलाई कांग्रेसी आँगनमा देउसी खेल्दै हिँडेको बताए । नेता बास्कोटाले बालुवाटारमा गठबन्धनको लगातारको बैठकलाई लक्षित गर्दै रमिताको संज्ञा दिएका छन् । उनले रामराज्य प्राप्तिपछि नागरिक समाज कुम्भकर्णे निन्द्रामा रहेको टिप्पणी गरे । 

बास्कोटाले ट्वीटरमा लेखेका छन्, ‘बालुवाटारमा रमिता छ । डेंगीको फैलावटले जनता हैरान छन् । सरकार चलाउन सिकाउनेलाई देउवाले उल्टै तोरीको फूल देखाई दिएपछि कांग्रेसभित्रकै डेंगीबाट त्राहीमाम छन् । देश जोगाउन माझी खोज्न हिँडेकाहरू कांग्रेसी आँगनमा देउसी खेल्दै छन् । रामराज्य प्राप्तिपछि सुतेको नागरिक समाज कुम्भकर्णे निन्द्रामै छ ।’