नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले अध्यक्ष पुष्पकमल दाहाल ‘प्रचण्ड’ चुनाव लड्न गोरखा गएकोमा गौरवान्वित बनेको बताएका छन् ।

प्रचण्ड चुनाव लड्न गोरखा नगइदिनु जनताप्रति अन्याय हुने उनको दाबी थियो ।

माओवादी केन्द्र गोरखा–काठमाडौं सम्पर्क समितिले बुधवार काठमाडौंमा आयोजना गरेको कार्यक्रममा श्रेष्ठले काठमाडौं, चितवन, सिराहा र रोल्पामा चुनाव लडेका प्रचण्ड गोरखा नजानु जनताप्रति अन्याय हुने दाबी गरे ।

२०७४ सालमा बाबुराम भट्टराईसँग पराजित भएका श्रेष्ठले प्रचण्डले चुनाव लडेको गोरखा–२ बाट प्रतिनिधिसभा चुनाव लड्न रहर गरेका थिए । 

४ कारणले चुनाव लड्न प्रचण्ड गोरखा पुगेका नारायणकाजीले दाबी गरे । ‘युवावस्थादेखिको भावनात्मक सम्बन्ध, जनयुद्धको तयारीको निर्णायक बैठक बसेको, पृथ्वीनारायण शाहले भौगोलिक एकीकरण गरेजस्तै आर्थिक सामाजिक समृद्धिको फड्को मार्न र शान्तिप्रक्रियाको बाँकी कार्यभार पूरा गर्न प्रचण्ड चुनाव लड्न गोरखा जानु भएको हो,’ श्रेष्ठले भने । 

प्रचण्डले कीर्तिमानी जीत हासिल गर्नुपर्ने भन्दै काठमाडौंमा रहेका सबै मतदातालाई मतदान केन्द्रमा पुर्‍याउनुपर्ने बताए । ‘मुख्य प्रतिस्पर्धा माओवादी र कांग्रेसबीच हो भनेर हाम्रै मतदाताले भोट हाल्न अल्छी गर्लान्, त्यो छुट छैन, कीर्तिमानी जीत हासिल गर्नुपर्छ,’ उनले भने ।