नेकपा एमालेका सचिव गोकर्ण विष्टले देशको विकास र समृद्धिका लागि एमालेको बहुमत आवश्यक भएको बताएका छन् । 

शनिवार बिहान तम्घासमा पत्रकारहरूसँग कुराकानी गर्दै गुल्मीको २ नम्बर निर्वाचन क्षेत्रमा प्रतिनिधिसभा सदस्यका उम्मेदवार समेत रहेका विष्टले एमालेबाहेक अन्य दलसँग देश विकास र जनताको समृद्धिका स्पष्ट योजना र सही नेतृत्व नभएको तर्क गरे ।

उनले एमालेको घोषणापत्र र विगतमा गरेका लोकप्रिय कामहरूका आधारमा मंसिर ४ गते हुने प्रतिनिधिसभा तथा प्रदेशसभा चुनावमा एमालेको बहुमतलाई कसैले रोक्न नसक्ने दाबी समेत गरे ।

‘विगतमा नेकपा एमालेले गरेका तमाम कामहरू र अघि सारेका योजना र कार्यक्रमका आधारमा फेरि पनि जनताले एमालेलाई नै बहुमत दिँदैछन्,’ विष्टले भने, ‘सत्ता गठबन्धनसँग न्युनतम साझा कार्यक्रम पनि नभएकाले यो दिशाहीन र गन्तव्यविहीन छ, भावी प्रधानमन्त्री को हुने भन्ने पनि छैन तर एमालेले स्पष्ट एजेण्डासहित भावी प्रधानमन्त्री केपी शर्मा ओलीलाई तोकेकाले एमालेको पक्षमा बहुमत आउँछ ।’

आफू ऊर्जामन्त्री र श्रम तथा रोजगार तथा मन्त्री हुँदा गरेका युगान्तकारी निर्णय र जनप्रिय काम तथा गुल्मीको २ नम्बर क्षेत्रमा खानेपानी, विद्युत्, सडक, शिक्षा, स्वास्थ्य र खेलकुदका क्षेत्रमा गरेका कामका आधारमा आफ्नो जीत निश्चित भएको विष्टले दाबी गरे । आफू सांसद र मन्त्री हुँदा कसैलाई पक्षपात र भेदभाव नगरी काम गरेकाले सबै दलका मतदाताको आफूप्रति सद्भाव र सहयोग गरेको विष्टले दाबी गरेका छन् ।