नेकपा माओवादी केन्द्रका उपमहासचिव वर्षमान पुन रोल्पा जिल्लाबाट प्रतिनिधिसभा सदस्यका रूपमा दोस्रो पटक विजयी भएका छन् ।

यसअघि विक्रम संवत् २०७४ सालमा भएको निर्वाचनमा पनि उनी सोही जिल्लाबाट विजयी भएका थिए । संसदीय राजनीतिमा यो उनको तेस्रो विजयी यात्रा हो ।

विक्रम संवत् २०६४ सालमा भएको संविधान सभाको निर्वाचनमा उनी ललितपुर–१ बाट विजयी भएका थिए ।

विक्रम संवत् २०७० सालको संविधानसभा निर्वाचनमा भने उनी मोरङबाट पराजित भएका थिए । पूर्व अर्थमन्त्री समेत रहेका नेता पुन सत्तारुढ वाम लोकतान्त्रिक गठबन्धनको तर्फबाट साझा उम्मेदवार हुन् ।

उनले कूल ४१ हजार ७१४ मत प्राप्त गरेका छन् । उनका निकटतम प्रतिस्पर्धी नेकपा एमालेका पूर्णबहादुर बुढामगरले १६ हजार ४८५ मत प्राप्त गरे । विजयी भएका नेता पुनले २५ हजार २२९ मतको अग्रता कायम राखेका छन् ।

निर्वाचन आयोगका अनुसार राष्ट्रिय प्रजातन्त्र पार्टीका उम्मेदवार लीला रावलले २ हजार ५५६, राप्रपा नेपालका रामबहादुर वली क्षेत्रीले ८०३ र नेपाल मजदुर किसान पार्टीका नातीभाई ह््योम्बाले १५२ मत प्राप्त गरेका छन् ।

संयोग कस्तो परेको छ भने निर्वाचित भएका पुन र उनका प्रतिस्पर्धी बुढामगर तत्कालीन समयमा एउटै पार्टीमा आबद्ध थिए । पुन तत्कालीन जनमुक्ति सेनाको डेपुटी कमाण्डरको भूमिकामा रहँदा बुढामगर भने उनी मातहतको कमाण्डरको रूपमा थिए । सर्वोच्च अदालतले तत्कालीन नेकपालाई नेकपा एमाले र माओवादी केन्द्रमा विभक्त गरिदिएपछि बुढामगर एमालेमा नै रहे ।

यसपटक पूर्व सहकर्मी बीचको प्रतिस्पर्धालाई राष्ट्रिय रूपमा नै महत्त्वका साथ हेरिएको थियो । 

शुरूआती चरणदेखि नै अग्रता कायम गर्दै माओवादी केन्द्रका उम्मेदवार पुनले अन्तिमसम्म नै त्यसलाई कायम मात्रै राखेनन्, फराकिलो मतान्तरले विजयी भए । रोल्पामा कूल मतदाता संख्या १ लाख ४५ हजार ४७१ रहे पनि मंसिर ४ गते भएको निर्वाचनमा ६१ हजार ७१० मत मात्रै खसेको थियो । कूल सदर मत ६१ हजार ७१० हुँदा बदर मत भने ५ हजार ३११ रहेको छ । 

प्रदेश सभातर्फ (१) मा माओवादी केन्द्रकै जोखबहादुर महरा निर्वाचित भएका छन् भने (२) मा माओवादी केन्द्र छाडेर स्वतन्त्र उम्मेदवारी दिएका दीपेन्द्र पुन निर्वाचित भएका छन् ।

निर्वाचित नेता पुनको जन्म रोल्पाको जंकोटमा विक्रम संवत् २०२८ जेठ १८ गते भएको हो । उनका बुवाको नाम इर्खराम पुन र आमाको नाम तिर्थमाली पुन हो । उनकी जीवन संगीनी ओनसरी घर्ती काठमाडौं–२ बाट गठबन्धनको साझा उम्मेदवार भए पनि जीत निकाल्न सकिनन् ।

प्राथमिक शिक्षा रोल्पाको बालकल्याण माविबाट पूरा गरेका पूर्व ऊर्जा जलस्रोत तथा सिँचाइमन्त्री रहेका नेता पुनले २०४९ सालमा नेपाल ल क्याम्पसबाट बीएल गरेका छन् ।

पञ्चायकालमै अनेरास्ववियुमा आवद्ध हुँदै वाम आन्दोलनमा सक्रिय भएका उनी विक्रम संवत् २०५२ सालदेखि नै जनयुद्धमा सहभागी भए । उनी तत्कालीन माओवादीको तर्फबाट काठमाडौं उपत्यकामा आन्दोलन परिचालन गर्ने मुख्य नेतृत्वमा थिए । ‘अनन्त’को नामले परिचित नेता पुनले राज्यबाट संविधानसभा पदक प्राप्त गरेका छन् । – रमेश लम्साल/रासस