दिगो आर्थिक विकासका लागि बलियो र स्थिर सरकार अहिलेको आवश्यक्ता भएको निजी क्षेत्रले बताएको छ । मुलुकको अर्थतन्त्रमा ७० प्रतिशत योगदान गर्ने निजी क्षेत्रसँग सहकार्य गर्ने नेतृत्व सरकारमा आउँछ कि आउँदैन भन्ने चिन्ता भएको उनीहरूको भनाइ छ । 

निजी क्षेत्रले मुलुकमा बलियो स्थिर सरकार नभएको कारण आर्थिक समृद्धिमा मुलुक पछाडि परेको दाबी गरेको छ । नेपाल उद्योग वाणिज्य महासंघको पत्रकार सम्मेलनमा महासंघका अध्यक्ष शेखर गोल्छाले सबै नेपालीहरुको आर्थिक समृद्धि चाहेको भन्दै मुलुकमा समृद्धि ल्याउनसक्ने नेतृत्व सरकारमा आउनुपर्ने धारणा राखे । उनले अहिलेसम्म सबै राजनीतिक दलहरुले आर्थिक एजेण्डा बोके पनि लोकप्रियता कमाउनको लागि मात्रै भएको बताए । 

अध्यक्ष गोल्छाले अब बन्ने सरकारले राजनीतिक एजेण्डा भन्दा पनि आर्थिक एजेण्डा विशेष गरेर वर्तमान अर्थतन्त्र संकटमा सुधार गरी दिगो आर्थिक विकास गर्नसक्ने सरकार बन्नुपर्ने बताए । उनले संकट रहेको अर्थतन्त्रलाई सवल बनाउनसक्ने नेतृत्वमा सरकार बन्ने विश्वास निजी क्षेत्रको रहेको बताए । उनले मुलुकमा आर्थिक समृद्धि ल्याउनको लागि निजी क्षेत्रसँग सहकार्य गर्ने नेतृत्व सरकार बन्ने विश्वास लिएको बताए । 

त्यस्तै, नेपाल चेम्बर अफ कमर्सका अध्यक्ष राजेन्द्र मल्लले राजनतिक एजेण्डालाई भन्दा पनि आर्थिक एजेण्डा प्राथमिकता दिने नेतृत्व सरकारमा आउनुपर्ने बताए । उनले चुनावको परिणामले एउटा पार्टीको सरकार बन्नसक्ने अवस्था नदेखिएकाले मिलिजुली सरकार भए पनि आर्थिक स्थायित्व दिनसक्ने नेतृत्वको सरकार बन्नुपर्ने बताए । उनले राजनीतिक पार्टीका फरकफरक धारणा भए पनि आर्थिक एजेण्डामा सबै दलका नेताहरुको एउटै धारणा भएको सरकार आउनु आवश्यक रहेको बताए । 
त्यस्तै, उद्योगी तथा गोल्यान गु्रपका अध्यक्ष पवन गोल्यानले दिगो आर्थिक विकास गरी देश र जनताको लागि काम गर्ने सरकार आउन आवश्यक रहेको बताए । उनले अब बन्ने सरकार राजनीतिक भागबण्डा र राजनीतिलाई छाडेर देश बनाउने ऐजेण्डामा केन्द्रित बन्नुपर्ने बताए । 

अध्यक्ष गोल्यानले पाँच वर्षमा देशको बाटो सुहाउँदो र आर्थिक विकासमा सहज हुने नीति बनाउनसक्ने नेतृत्वमा सरकार बन्नुपर्ने बताए । उनले नेपालका राजनीतिक दलहरुले सोचमा परिर्वतन गर्न आवश्यक भएको बताए । उनले आफू र आफ्नो पार्टीको लागि नभएर देशको लागि सोच्ने नेतृत्वले मात्रै अर्थतन्त्रमा परिर्वतन ल्याउने बताए ।