संसदीय दलको नेताका लागि उम्मेदवारी दिएका कांग्रेस महामन्त्री गगन थापाले कांग्रेसको भविष्य हेरेर शेरबहादुर देउवाले उम्मेदवारी फिर्ता लिने अपेक्षा रहेको बताएका छन् । सोमवार अपराह्न संसदीय दलको नेताका लागि उम्मेदवारी दर्ता गराएपछि थापाले कांग्रेसलाई अगाडि बढाउन र मतदाताको आकांक्षा पूरा गर्न आफूले उम्मेदवारी दिएको बताएका हुन् । 

‘पार्टीभित्र भइरहेको परिवर्तनको चाहनालाई बुझेर सभापतिज्युले उम्मेदवारी फिर्ता गर्नुहुनेछ भन्ने विश्वास छ । कांग्रेसको भविष्यप्रति चिन्ता र परिवर्तनको महसुस गरेर रामचन्द्र पौडेल र प्रकाशमान सिंहले पनि सोच्नु हुनेछ भन्ने विश्वास छ’, थापाले भने । 

स्थायित्व र परिवर्तनको युवाहरूको चाहनालाई डा. शेखर कोइरालाले सम्बोधन गरेको भन्दै गगनले धन्यवाद दिए । ‘निर्वाचित भएर आएका सांसदहरूले मतदाताको परिवर्तनको आकांक्षालाई बुझ्नु भएको होला, मतदाताको चाहना के छ भन्ने कुरा भोलि बिहानको संसदीय दलको चुनावमा देखियोस्’ गगनले भने ।