आइतबार नेकपा माओवादीका अध्यक्ष प्रचण्ड प्रधानमन्त्रीमा नियुक्त भएर ८ सदस्यीय मन्त्रिमण्डल बनेसँगै सरकारले आफ्नो काम गरिरहेको छ । तर थप मन्त्रिमण्डल विस्तारमा भने सात दलीय गठबन्धन अनिर्णीत रहेको छ । गठबन्धनभित्रका केही दलहरुले सरकारमा जाने बारेमा पार्टीबाट निर्णय गर्न बाँकी रहेकाले गठबन्धन अनिर्णीत बनेको हो । 

सरकारलाई समर्थन गरेको राप्रपाले बुधबार बसेको केन्द्रीय कार्यसम्पादन समितिको बैठकबाट सरकारमा जाने निर्णय गरेको छ भने जसपाले यसबारे निर्णय लिन यही साता बैठक बोलाएको छ । 
सरकारलाई समर्थन गरेको नागरिक उन्मुक्ति पार्टीले भने आफ्ना नेता रेशम चौधरीको रिहाइ भएमात्रै सरकारमा सहभागी हुने बताउँदै आएको छ । 

यस्तो सन्दर्भमा हाल एमालेबाट ४, राष्ट्रिय स्वतन्त्र पार्टीबाट एक, जनमत पार्टीबाट एक र माओवादी केन्द्रबाट एक जना मन्त्री बनेका हुन् । माओवादी केन्द्रका अनुसार पूर्वसहमतिअनुसार पार्टीबाट नारायणकाजी श्रेष्ठलाई मन्त्री बनाइएको र अन्य मन्त्रीहरुको बारेमा गठबन्धन दलहरुको बैठक बसेर निर्णय भएपछि पार्टीको पनि केन्द्रीय कार्यालयको बैठक बसेर टुंगो लगाइनेछ ।