प्रतिनिधिसभा सभामुखको निर्वाचनअघि बिहीवार बिहान नेपाली कांग्रेसका वरिष्ठ नेता रामचन्द्र पौडेल प्रधानमन्त्री पुष्पकमल दाहाल ‘प्रचण्ड’लाई भेट्न बालुवाटार पुगेका छन् ।

बिहान ११ बजे प्रतिनिधि सभाको बैठक बसेर सभामुख चयन हुनुअघि पौडेल प्रधानमन्त्रीलाई भेट्न बालुवाटार पुगेका हुन् । 

तर भेटमा सभामुखको निर्वाचनभन्दा पनि राष्ट्रपति निर्वाचनमा छलफल केन्द्रित भएको जानकारी पौडेलका स्वकीय सचिव चिरञ्जीवी अधिकारीले दिए ।  

‘हुनलाई आज सभामुखको निर्वाचन हो तर प्रधानमन्त्री र कांग्रेस नेता पौडेलबीच राष्ट्रपतिको निर्वाचनका विषयमा छलफल भएको बुझेका छौं,’ अधिकारीले लोकान्तरलाई भने, ‘प्रधानमन्त्रीले पनि यसअघिदेखि दलबीच सहमति हुन्छ भने छलफल गरेर सहमतिमा राष्ट्रपति, उपराष्ट्रपति, सभामुख सहितका पदमा अघि बढ्न सकिन्छ कि भन्दै आउनुभएको छ । यसैले भेटघाट भएको हो ।’

आधा घण्टा भएको भेटमा कुनै सहमति नभए पनि यसअघिदेखिकै छलफलको निरन्तरता भएको जानकारी अधिकारीले दिए । 

बिहीवार प्रतिनिधिसभा सभामुखका लागि निर्वाचन हुँदैछ । सत्ता गठबन्धनबाट देवराज घिमिरे र विपक्षबाट ईश्वरी न्यौपाने उम्मेदवार छन् । 

अघिल्लो सत्ता गठबन्धन नभत्किएको भए नेता पौडेलको राष्ट्रपति हुने सम्भावना धेरै रहेको बताइन्छ । यसैले पनि पौडेलले अझै राष्ट्रपतिको निर्वाचनमा सहमतिमा कांग्रेस, माओवादी सहितका दल मिलेर अघि बढ्न सकिन्छ कि भनेर भेटघाट गर्दै आएका छन् ।