हाम्रो पात्रोले ल्यायो डिजिटल पेमेन्ट सिस्टम ‘हाम्रो पे’, घर र गाडी किन्न सकिने

 लोकप्रिय एप ‘हाम्रो पात्रो’ले नयाँ फिचर थपेको छ । डिजिटल एपमा विभिन्न फिचर राखेर लोकप्रिय भएको हाम्रो पात्रोले पछिल्लो पटक ‘हाम्रो पे अनलाइन पेमेन्ट सिस्टम’ फिचर थपेको हो ।
शुक्रबार आयोजित पत्रकार सम्मेलनमा कम्पनीकी निर्देशक सुदिना गौतमले सपर एपको रुपमा विकास गर्ने योजनाका साथ बैंकिङ ट्रान्सफर, मोबाइल बैंकिङ, खानेपानीको बिल भुक्तानी, विद्युतको बिल भुक्तानी, मोबाइलमा टपअप लगायतका फिचर ‘हाम्रो पे’मा रहेको जानकारी दिइन् । 

हाम्रो पेले नेपालमा रहेका ६ वटा भाषामा सेवा उपलब्ध गराएको छ । कम्पनीका सीईओ शिशिर खनालका अनुसार अङ्ग्रेजी, नेपाली, मैथिली, नेपाल भाषा (नेवारी भाषा), थारु र डोटेली भाषामा सेवा उपलब्ध गराइएको छ । 

‘हामीले युजर फ्रेन्डली होस् भनेर अहिले सुरुमा ६ वटा भाषामा सेवा उपलब्ध गराएका छौँ । यसले नेपाली भाषा तथा संस्कृतिलाई पनि जगेर्ना गर्न सहयोग पुग्छ भन्ने विश्वास हो,’ खनालले भने, ‘प्रयोगकर्तालाई पनि सहज हुने विश्वास लिएका छौं ।’

यो अनलाईन पेमेन्ट सिस्टमले अफलाइन सेवा पनि उपलब्ध गराएको छ । जसले गर्दा इन्टरनेट नहुने ठाउँमा पनि क्यूआर कोड स्क्यान गरेर पैसा तिर्न मिल्छ । जसले गर्दा इन्टरनेट खोजिरहनु पर्ने झन्झटबाट मुक्ति मिल्ने खनालले बताए ।

हाम्रो पेमा विश्व भरबाट नेपालीहरूले पैसा पठाउन सक्ने गरी रेमिट्यान्स सुविधा रहेको छ । त्यसमार्फत आफ्नो खातामा कति पैसा छ र कारोबार बारेको जानकारी नेपाली मितिमा हेर्न सकिन्छ । यसको अर्को फिचरका रुपमा मासिकरूपमा भएको खर्च र आम्दानीको लेखा राख्ने काम पनि गर्छ ।

‘हामीले यसमा एउटा फिचर लेखाको रुपमा राखेका छौँ, जसमा महिनाभरी गरेको खर्च केमा कति खर्च गरियो, कसलाई दिइयो भन्ने सबै कुराको तथ्याङ्क राख्छ, जसले आफ्नो मासिक हिसाब किताबको बारेमा जानकारी पाउँछौँ, सीईओ खनालले भने ।

यस एपमा आउने समस्या समाधानका लागि कम्पनीले २४ सै घण्टा कस्टमर सपोर्ट सर्भिस पनि उपलब्ध गराएको छ । यो एपमा ३ प्रकार पैसा लोड गर्न सकिन्छ । पहिलो मोबाइल बैंकिङबाट, दोस्रो विभिन्न बैकहरुबाट र तेस्रो आइपीएस कनेक्टबाट लोड गर्न सकिने गरि व्यवस्था मिलाइएको छ ।

हाम्रो पेबाट घर र गाडी किन्न सकिने
हाम्रो पेको सिस्टम भविष्यमा घर र गाडी किन्न सकिने गरी विकास गरिएको छ । नेपाल राष्ट्र बैकबाट अनुमति लिएर सेवा सुरु गरेकाले त्यसलाई सुपर एपको रुपमा विकास गरेर अघि बढ्ने योजना रहेको हाम्रा पात्रोकी निर्देशक सुदिना गौतमले बताइन् ।

‘अहिले सानो फिचरबाट सुरुवात गरेका छौँ भविष्यमा यसलाई सुपर एपको रुपमा विकास गरेर घर र गाडी पनि यसैबाट किन्न सक्ने गरी विकास गर्न लागेका छौँ, निर्देशक गौतमले भनिन् ।
 नेपालको डिजिटल नेपाल भन्ने भिजनलाई सहयोग हुने हिसाबले सरकारसँग सहकार्य गरेर अगाडि बढ्ने गौतमले बताइन् । अहिले देशभरमा १ करोड भन्दा धेरै जनाले हाम्रो पात्रोको एप डाउनलोड गरेका छन् । त्यो नेपालीहरुको माया भएको र त्यसलाई सधैं नै पाइरहन नयाँ सुविधाहरु ल्याएको उनले बताइन् ।

सन् २०१० देखि डिजिटल पात्रोका रुपमा सुरु भएको नेपाली पात्रोले पछिल्लो समयमा एउटै डिजिटल प्लेटफर्ममा विभिन्न सेवाहरु दिँदै आएको छ । हाम्रो पात्रोले सन् २०१२ बाट राशिफल, स्वास्थ्य लगायतका सेवा सुरु गरेको थियो । यस्तै सन् २०१९ बाट ज्योतिषी सेवा उपलब्ध गराउँदै आएको छ  । यस्तै नेपाली मिडियाहरुसँग सहकार्य गरेर संसारभर समाचारहरू पनि उपलब्ध गराउँदै आएको छ ।