सरकारले नगद मार्जिन र प्रतिबन्ध हटाए पनि नेपालले गर्ने आयात भने १९ प्रतिशतले घटेको छ ।

सरकारले वैशाखदेखि लगाएको आयात प्रतिबन्ध पुसदेखि हटाएको हो ।

यो समयमा नेपाल राष्ट्र बैंकले लगाएको १५० प्रतिशतसम्मको नगद मार्जिन पनि हटाएको छ ।

तर आयात भने  गत वर्षको तुलनामा चालू आर्थिक वर्षको ७ महिनाको अवधिमा आयात १९ दशमलव ९० प्रतिशतले घटेको छ । सरकारले उच्च आयातका कारण तरलता अभाव भएको भन्दै आयातमा कडाइ गरेको थियो । जसले गर्दा गत वर्षको तुलनामा यो वर्ष आयात घटेको हो ।

चालू आर्थिक वर्षको ७ महिनामा आयातसँगै निर्यात पनि घटेको छ ।

नेपालले गत वर्षको ७ महिनाको अवधिमा १ खर्ब ३१ अर्ब ६५ करोड ६० लाख रुपैयाँको वस्तु निर्यात गरेको थियो । तर, यो वर्षको सोही अवधिमा नेपालले ९३ अर्ब ४३ करोड २३ लाख रुपैयाँको मात्रै वस्तु निर्यात गरेको छ । जुन २९ दशमलव ०३ प्रतिशतले कम हो ।

चालु आर्थिक वर्षको ७ महिनाको अवधिमा नेपालले ९ खर्ब १९ अर्ब १६ करोड ५३ लाख रुपैयाँको वस्तु आयात गरेको छ । नेपालले गत वर्षको सोही अवधिमा ११ खर्ब ४७ अर्ब ४६ करोड ४४ लाख रुपैयाँको वस्तु आयात गरेको थियो ।

नेपालले चालू आर्थिक वर्षको ७ महिनाको अवधिमा ८ खर्ब २५ अर्ब ७३ करोड ३० लाख रुपैयाँको व्यापार घाटा बेहोरेको छ । गत वर्ष नेपालले सोही अवधिमा १० खर्ब १५ अर्ब ८० करोड ८४ लाख रुपैयाँको व्यापारघाटा बेहोरेको थियो।

७ महिनाको अवधिमा १० खर्ब १२ अर्ब ५९ करोड ७६ लाख रुपैयाँको वैदेशिक व्यापार गरेको छ । गत वर्षको सोही अवधिमा नेपालले १२ खर्ब ७९ अर्ब १२ करोड ४ लाख रुपैयाँको वैदेशिक व्यापार गरेको भन्सार विभागले बुधबार जारी गरेको तथ्यांकमा उल्लेख छ ।