नेकपाका महासचिव विप्लवले माओवादीलाई अपराधी र हत्यारा भन्नेलाई ठेगान लगाउने चेतावनी दिएका छन् ।

शहीद तथा बेपत्ता योद्धा सन्तति फाउन्डेसन माओवादी विचारधाराका प्रचण्ड नेतृत्वको माओवादी, डा. बाबुराम भट्टराईको नेतृत्वको नेकपा समाजवादी पार्टीसहितका दलका शीर्ष नेता सहभागी कार्यक्रममा विप्लवले यस्तो चेतावनी दिएका हुन् । 

‘धनसम्पत्तिको रवाफ दिने, लुट्ने, अधिकारको लागि विद्रोह गर्ने अपराधी हुन्छ ? माओवादीलाई अपराधी भनेर व्याख्या गरिएको छ । यो लोकतन्त्रमा माओवादीलाई अपराधी बनाउने अधिकार छैन,’ विप्लवले भने, ‘माओवादीलाई अपराधी बनाउन खोजे इतिहास दोहोरिन्छ । दोहोर्‍याउन सकिन्छ । जनताको आशामा ऊर्जा भर्दै आएका छौं । गाउँमा प्रश्न छन् तर बेपत्ता परिवारका सदस्यलाई ऊर्जा भर्‍यौँ भने फेरि ६० साल फर्किन्छ ।’

इतिहास दोहोरिने भनेको माओवादीहरू फेरि एक ठाउँमा उभिने वातावरण बन्ने उनको भनाइ थियो ।

 ‘इतिहास दोहोरिने भनेका माओवादी एक हुन्छन् । आवश्यकता पर्‍यो भने जनमुक्ति सेना बन्छ । सबै तयार हुनुपर्छ । माओवादी धारका सबै तयार हुनुपर्छ । देशमा हिजैको सामन्तालाई फर्काएर जनताताले मुक्ति पाउँछन् ?’ उनले भने, ‘माओवादी मात्रै होइन किसfन र सुकुम्बासीलई आँट भर्नुपर्छ ।’

अब माओवादी मात्रै नभई सबै कम्युनिष्टको चेत खुल्नुपर्ने उनले बताए । 

निःशर्त जीवनलाई हामफालेर युद्धमा होमिएकालाई फेरि पनि लड्न गाह्रो नहुने उनको भनाइ थियो ।

‘नेपालमा जनताको सत्ता स्थापना गर्ने हाम्रो अभियान हो । सबै जातजातिलाई अधिकार दिलाउने पार्टी माओवादी हो । गाउँका जाली र फटाहाहरूलाई लखट्ने माओवादी हो । हजारौँ बिघा जमिन सुकुमबासीलाई बाँडेको जनयुद्धले हो’, विप्लवले भने, ‘जताबाट नापे पनि माअ‍ोवादी आन्दोलनका सबै आयाम गौरव गर्ने खालका छ । तर माओवादीलाई अपराधी करार गर्न कोही हिँड्छ भने चुप लागेर बस्दैनौं ।’