जनमतका पार्टीका अध्यक्ष सीके राउतले संविधानको मर्मविपरीत दबाब र प्रहारमा उपराष्ट्रपतिमा पुरुष उम्मेदवारी दर्ताप्रति आपत्ति जनाएका छन् ।

सत्ता गठबन्धनमा आबद्ध भए पनि राउतको जनमत पार्टीले ममता झालाई उपराष्ट्रपतिको उम्मेदवार बनाएको छ। 

‘निर्वाचन आयोगले संविधानको धारा ३८ को उपधारा ४ उद्धृत गर्दै हरेक हालतमा उपराष्ट्रपतिको उम्मेदवार महिला नै हुनुपर्ने अडान लिएपछि अहिले कुनै पनि दबाa वा प्रभावमा आएर पुरुष उम्मेदवार दर्ता गरिनु अत्यन्त खेदजनक छ’, राउतले सामाजिक सञ्जालमा लेखेका छन्, ‘यसले आयोगको विश्वसनीयतामाथि नै प्रश्न चिह्न खडा गरेको छ। संविधानको मूल मर्म, जनभावना तथा महिलाको अधिकारमाथि यसले प्रहार गरेको छ।  यस गैरसंवैधानिक कार्यको विरुद्धमा र महिलाको न्यायको लागि हामी उजुरी दिन्छौं।’ 

सत्ता गठबन्धनको तर्फबाट जसपाका नेता रामसहायप्रसाद यादव र प्रमिला यादवको उम्मेदवारी परेको छ । जसपाका दुवै उम्मेदवारलाई सत्ता गठबन्धनमा आबद्ध कांग्रेस, माओवादी, नेकपा एससहितका दलको समर्थन रहेको छ । जनमतका उम्मेदवारलाई लोसपा, नागरिक उन्मुक्ति दलको समर्थन छ ।

संविधानको धारा ३८ (४) मा ‘राज्यका सबै निकायमा महिलालाई समानुपातिक समावेशी सिद्धान्तका आधारमा सहभागी हुने हक हुनेछ’, भन्ने उल्लेख छ ।

आयोगले शुक्रबार ‘उपराष्ट्रपति पदको निर्वाचनका लागि उम्मेदवारको मनोनयनपत्र दर्ताका सन्दर्भमा उम्मेदवारको योग्यताबारे थप स्पष्टतासहित नवनिर्वाचित सम्माननीय राष्ट्रपतिको लिंग वा समुदायभन्दा फरक हुने गरी उपराष्ट्रपतिको निर्वाचनका लागि उम्मेदवारको मनोनयनपत्र दर्ता गर्न निर्वाचन अधिकृतलाई निर्देशन दिने निर्णय गरेको थियो । 

आयोगको यस्तो निर्णयपछि जनमतले झालाई उपराष्ट्रपतिको उम्मेदवार उठाएको हो ।

पढ्नुहोस् यो पनि 

उपराष्ट्रपति उम्मेदवार रामसहाय यादवविरुद्ध एमालेले दियो उजुरी