सभापति दम्पतीको हेपाइ र अपमान सहन नसकेको भन्दै स्वर्णिम वाग्लेले नेपाली कांग्रेस छाडेका छन्।

उनले आज एक पत्र लेख्दै कांग्रेस छाडेको औपचारिक जानकारी गराएका हुन्। 

वाग्लेले नेता डा. शेखर कोइरालालाई आफू अब कांग्रेसमा रहन नसक्ने सन्देश छाडेका हुन्।  

मंसिर ४ गतेको चुनावमा चितवन- १ बाट उनले प्रतिस्पर्धा गर्न खोजे पनि विश्व पौडेललाई टिकट दिइएको थियो ।

उनले लेखेको पत्रको व्यहोरा यस्तो छ-

प्रिय दाइ, 
हजुरहरूको अपार सद्भावका बाबजुद म काँग्रेसमा रहन नसक्ने अवस्था आएको छ। देउवा–आरजु गिरोहको निरन्तर हेपाइ र अपमानले यो स्थिति ल्याएको हो। अब कुरेर बस्ने कृपा र निगाहको जीवनपर्यन्त राजनीतिभन्दा समयसीमा तोकेर आफ्नो उमेर, ज्ञान र ऊर्जा सान्दर्भिक रहँदै ‘डेलिभरी’ को प्रयोगमा जान चाहे। यो निर्णय लिनुअघि हजुरहरूसँग भेटेको भए निश्चय पनि काँग्रेस नछोड्न भन्नुहुने र त्यसपछि छोड्दा अवज्ञा गरेको हुने भएकोले श्रद्धापूर्वक पछि नै हामी बस्नेछौँ ।
काँग्रेस पार्टीमा हजुरहरूको निर्णायक हैसियत बनेको दिन फेरि हामी कुनै न कुनै रूपमा जोडिन सक्ने आशा छ । त्यतिन्जेल जहाँजहाँ रहन्छौँ, त्यहीँबाट सहकार्य र सहयोग गर्ने र अहिलेको आत्मीय मित्रता कायम राख्ने वाचा गर्दछु ।