लगानी बोर्डले ठूला पूर्वाधार परियोजनामा लगानी केन्द्रित गर्ने निर्णय गरेको छ । 

बिहीवार लगानी बोर्डको कार्यालयमा बसेको बैठकले ठूला पूर्वाधार परियोजनामा लगानी केन्द्रित गर्ने निर्णय गरेको हो ।

प्रधानमन्त्री पुष्पकमल दाहाल 'प्रचण्ड'को अध्यक्षतामा बसेको बोर्डको बैठकपछि सञ्चारकर्मीसँग कुराकानी गर्दै अर्थमन्त्री डा.प्रकाशशरण महतले बैठकले जलविद्युत् आयोजनाहरूको काम तत्काल अघि बढाउने निर्णय गरेको बताए।

तल्लो अरुण, अप्पर मर्स्याङ्दी, दूधकोशी-२ लगायत जलविद्युत् आयोजनालाई अघि बढाउने निर्णय भएको छ।

बैठकमा  सिमेन्टमा लगानी भएका आयोजना पनि उत्पादन गर्ने तहमा पुगेकोबारे पनि छलफल भएको अर्थमन्त्री महतले जानकारी दिए। रासायनिक मलको विषयमा विस्तृत अध्ययन गर्न २ वैदेशिक लगानीकर्ताहरूलाई अनुमति दिने प्रक्रिया अघि बढाउने पनि निर्णय भएको उनले जनाए।

अर्थमन्त्री महतले ठूला आयोजनालाई अघि बढाउने र आगामी दिनमा लगानी बोर्डको क्षमतालाई वृद्धि गर्ने र प्राविधिक क्षमता लगायत सबै क्षमता वृद्धि गरी भविष्यमा थप लगानीको परिवेश देशमा निर्माण गर्ने कुरामा बैठकमा विशेष छलफल भएको बताए। 

लगानी बोर्डका उपाध्यक्षसमेत रहेका अर्थमन्त्री महतले इन्भेष्टमेण्ट समिट गर्नेबारे पनि बैठकमा छलफल भएको बताए।

स्वदेशी र विदेशी लगानीकर्ताले कुनै समस्याबिना चाँडोभन्दा चाँडो नेपालमा लगानी गर्न सकून् र लगानीमार्फत आर्थिक समृद्धि हुन सकोस् भन्ने कुरा बैठकमा छलफल भएको बताए।