नेपाली कांग्रेसका महामन्त्री विश्वप्रकाश शर्माले नक्कली भुटानी शरणार्थी खडा गरेर अमेरिका पठाउने ठगीमा कांग्रेस एमालेका जो लागेको भए पनि अनुसन्धान हुनुपर्ने बताएका छन् । 

पदाधिकारीको बैठकपछि सञ्चारकर्मीसँग कुरा गर्दै शर्माले कानूनले काम गर्दा राजनीतिले बोल्न नमिल्ने तर गहिरो अनुसन्धानमा सघाउनुपर्ने उनको मत छ ।

‘निर्दोष कारागारमा नपरुन दोषी नउम्कुन तर कसैले पनि मेरो दलका भन्नुभएन । भ्रष्टाचारमा हदम्याद राखिनु हुन्न । भुटानी शरणार्थीको मात्रै होइन ७ सालदेखिको फाइल खोलौं । दलका नेता पर्दा दलले संरक्षण गर्नु हुँदैन । कानुनले स्वतन्त्र ढंगले काम गर्न पाउनुपर्छ’ शर्माले भने, ‘कांग्रेस विधिको शासनमा विश्वास गर्छ । प्रश्न दलको व्यक्ति भन्नेतिर लाग्नु नै हुँदैन । विधिको विषयमा कांग्रेस र एमाले भन्ने हुँदैन । तथ्यमा आधारित भएर गहिरो अनुसन्धान गर्नुपर्छ । कानुनले काम गर्दा राजनीति चुप बस्नुपर्छ ।’

यस अघि कांग्रेसले नै ल्याएको कानूनको आधारमा कांग्रेसकै नेता भ्रष्टाचारमा दोषी ठहरिएको पनि उनले प्रष्ट्याए । यसैले कांग्रेस दोषीलाई लुकाउन नलाग्ने उनको भनाइ थियो ।