आजको मौसम–पहाडी भूभागमा बदली, यी स्थानमा वर्षाको सम्भावना

हाल देशमा  स्थानीय वायु तथा पश्चिमी वायुको सामान्य प्रभाव रहेको जल तथा मौसम पूर्वानुमान महाशाखाले जनाएको छ । जसअनुसार सोमबार बिहान लुम्बिनी प्रदेश र सुदूरपश्चिम प्रदेश लगायत देशका पहाडी भूभागमा आंशिकदेखि सामान्य बदली रहेको छ ।  बाँकी भूभागमा भने मौसम सामान्यतया सफा रहेको छ ।

यस्तै दिउँसो पहाडी भूभागमा आंशिकदेखि सामान्य बदली रहने सम्भावना छ ।  बाँकी भूभागमा आंशिक बदलीदेखि मौसम सामान्यतया सफा रहने छ। तर, कर्णाली प्रदेश र सुदूरपश्चिम प्रदेशका पहाडी भूभागका थोरै स्थानमा र अन्य प्रदेशका पहाडी भूभागका एक दुई स्थानहरूमा मेघ गर्जनसहित क्षणिक वा हल्का वर्षाको सम्भावना रहेको महाशाखाले जनाएको छ । यस्तै सुदूरपश्चिम प्रदेश र लुम्बिनी प्रदेशको तराईका भूभागमा सामान्य हावाहुरीको सम्भावना रहेको छ ।

यस्तै राति पहाडी भूभागमा आंशिकदेखि सामान्य बदली रहनुका साथै कोशी प्रदेश, कर्णाली प्रदेश र सुदूरपश्चिम प्रदेशका पहाडी भूभागका एक दुई स्थानमा  हल्का वर्षाको सम्भावना रहेको महाशाखाले जनाएको छ ।