प्रधानमन्त्री पुष्पकमल दाहाल ‘प्रचण्ड’ पत्नी सीता दाहालको निधनप्रति विभिन्न राजनीतिक दलका नेता, कूटनीतिक नियोगका प्रमुख तथा प्रतिनिधिले दुःख व्यक्त गरेका छन् ।

प्रधानमन्त्री निवास बालुवाटार पुगेर उनीहरूले बुधवार निधन भएकी सीताको तस्वीरमा माल्यार्पण गरी श्रद्धाञ्जलि अर्पण गरेका छन् । 

उनीहरूले शोक सन्तप्त परिवारप्रति समवेदना प्रकट गरेका प्रधानमन्त्रीको सचिवालयले जनाएको छ ।

त्यसअघि बिहीवार बिहान प्रधानमन्त्री प्रचण्डले सीताको तस्वीरमा पुष्पगुच्छा अर्पण गरे । नेकपा माओवादी केन्द्रका नेताहरू पम्फा भुसाल, वर्षमान पुन, मातृका यादव, ओनसरी घर्ती लगायतले श्रद्धाञ्जलि अर्पण गरेका थिए ।

नेपाली कांग्रेसका सभापति एवं पूर्व प्रधानमन्त्री शेरबहादुर देउवा, नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपाल लगायत विभिन्न पार्टीका नेताहरूले बालुवाटार पुगेर दिवंगत सीताको तस्वीरमा पुष्पगुच्छा अर्पण गरेका थिए ।

बिहीवारै शुभेच्छुक तथा कूटनीतिक नियोगका प्रमुख तथा प्रतिनिधिले श्रद्धाञ्जलि अर्पण गरेका थिए । नेपालका लागि कोरियाली राजदूत तेइ योङ्ग पार्क, दक्षिण एसियाली क्षेत्रीय सहयोग संगठन (सार्क) का महासचिव इसाला श्रवान विराकून, नेपालका लागि रसियन राजदूत अलेक्सेय नोभिकोभ, नेपालका लागि चिनियाँ राजदूत चेन सङ, नेपालका लागि बंगलादेश, इजराइल, श्रीलंका, फिनल्याण्ड, उत्तर कोरिया लगायत देशका राजदूतहरू बालुवाटार पुगेर दिवंगत सीताप्रति श्रद्धान्जलि अर्पण गरेका थिए ।

प्रधानमन्त्रीको सचिवालयले समवेदना प्रकट गर्न आउने शुभेच्छुकका लागि बिहीवार र शुक्रवार बिहान ८ः०० देखि १० बजेसम्म र अपराह्न ४ः०० देखि साँझ ६ः०० बजेसम्मका लागि समय निर्धारण गरेको थियो ।