कोशी प्रदेशका मुख्यमन्त्री उद्धव थापाले आज बुधवार कांग्रेसका गयानन्द मण्डललाई राज्यमन्त्री नियुक्त गरेका छन् ।

मुख्यमन्त्रीका स्वकीय सचिव मिलन चापागाईंका अनुसार गयानन्द मण्डललाई मुख्यमन्त्री थापाले कृषि राज्यमन्त्रीमा नियुक्त गरेका हुन् ।

उनले बुधवारै बिहान शपथ ग्रहण समेत गरेका छन् । विश्वासको मत लिने समय नजिकिँदै गर्दा थापाले मण्डललाई मन्त्री बनाएका हुन् । उनी प्रदेशसभा ज्येष्ठ सदस्य हुन् ।

कार्यबाहक सभामुख सिर्जना दनुवारले प्रदेशसभा बैठक नचलाएको खण्डमा ज्येष्ठ सदस्यले चलाउनुपर्ने परिस्थिति सिर्जना हुन सक्ने भएपछि थापाले मण्डललाई राज्यमन्त्रीमा लगेर थन्काएका हुन् । 

भदौ १३ गतेसम्म उनले विश्वासको मत लिइसक्नुपर्ने हुन्छ । कोशी प्रदेशमा सभामुख पद अहिले खाली छ । सभामुख बाबुराम गौतमलाई राजीनामा दिन लगाएर मन्त्री बनाइएको छ ।

यसअघि थापाले ४ मन्त्री नियुक्त गरिसकेका छन् । जसमा कांग्रेसबाट प्रदीपकुमार सुनुवार सिँचाइ  खानेपानी तथा ऊर्जा, माओवादी केन्द्रबाट बाबुराम गौतम आर्थिक मामिला तथा योजना, नेकपा एकीकृत समाजवादीबाट कमल जबेगु भौतिक पूर्वाधार विकास र जसपाबाट निर्मला लिम्बू स्वास्थ्य मन्त्री रहेका छन् ।