![](http://lktcdn.prixa.net/media/tinymce/file_manager/source/2017/Bhadau74/roshani.jpg?1505728742718)
काठमाडौं २ असोज– काठमाडौंको महाराजगञ्जस्थित कान्ति बाल अस्पतालको अंकोलोजि वार्डको ४४२ नम्बरको शैयामा मलिन अनुहारमा बसिरहेकी थिइन् काभ्रेकी रोशनी त्रिपाठी । उनकै छेउमा रहेकी उनकी आमा सिता त्रिपाठीको अनुहारमा बेचैनी थियो ।
रोशनीका आमाछोरी एक महिना अघिदेखि कान्ति बाल अस्पतालमा कष्टपूर्ण दिनहरु गुजार्दैछन छन् । सिताकी १४ वर्षकी छोरी रोशनी त्रिपाठीलाई रक्त क्यान्सर भएको छ ।
काभ्रेकै जनचेतना माध्यमिक विद्यालयमा कक्षा ९ मा पढ्दै गरेकी रोशनीलाई दुई महिना अघि बारम्बार ज्वरो आउँने र खोकी लाग्ने समस्या देखिन थाल्यो । रोशनी विरामी परेपछि सुरुमा उनी आमाले नजिकैको मेडिकलबाट औषधि ल्याएर खुवाइन् । तर रोशनीलाई मेडिकलको औषधिले निको भएन । निको नभएपछि काभ्रेको एक अस्पतालमा भर्ना गराइन् । एक साता सम्म अस्पतालमा भर्ना गरेर एन्टिबाइटिक खाएपछि रोशनीको खोकी र ज्वरो कम हुदै गयो ।
अस्पातलले एक साता पछि घर लैजाने अनुमति दियो । तर घर लगेको भोलिपल्टबाट रोशनीलाई फेरी एक सय ३ डिग्रीको ज्वारो आयो । अस्पतालमा भर्ना भएर एक सातासम्म औषधि खादा पनि निको नभएपनि आफन्तहरुको सल्लाहमा सिताले छोरी रोशनीलाई महाराजगञ्जको बाल कान्ति अस्पतालमा ल्याइन् । बाल कान्ति अस्पतालले भर्ना गरेर रोशनीको उपचार सुरु ग-यो । कान्तिमा उपचारको क्रममा रगत जाँच गर्दा रोशनीलाई ‘ब्लड क्यान्सर’ भएको रिर्पोट आयो ।
‘शुरुमा छोरीलाई लगातार ज्वारो आयो, गाउँमै सिटामोल किनेर खान दिए, सिटामोलले ठिक नभएपछि काभ्रेको अस्पताल लगे, त्यहापनि निको भएन अनि यहा ल्याएकी थिए’ रोशनीकी आमा सिताले लोकान्तरलाई बताइन् ,‘यहाँ ल्याएको ५ दिन पछि रगत जाँच गर्दा ब्लड क्यान्सर भएको थाहा भयो ।’
छोरीलाई ब्लड क्यान्सर भएको थाहा पाएपछि सिता छाँगाबाट खसेजस्तै भइन । घरबाट २० हजार लिएर छोरीको उपचार गराउन उनी काठमाडौं आएकी थिएन । ‘२० हजार रुपैया लिएर अस्पताल आएको दश हजार रुपैया काभ्रे मै सकियो । बचेको दश हजार लिएर काठमाडौंको बाल कान्तिमा भर्ना गरे । आफुसंग भएको पैसाले नपुगेपछि माइतिका आफन्तहरुको सहयोगमा छोरीको उपचार गराइरहेकि छु’ उनले भनिन् ।
रोशनीको उपचारमा खटिएका डा. कैलाश शाहले उनको राम्रोसंग नियमित उपचार भए क्यान्सर निको हुने बताएका छन् । सुरुको एक महिना अस्पतालमै राखेर उपचार गर्नुपर्ने भएकाले रोशनीलाई अस्पतालमै राखिएको डा. शाहले बताए । ‘अहिले हप्तामा तीन पटक रगत जाँच गराएका छौं । आवश्यक औषधिहरुपनि दिएका छौं’ डा साहले लोकान्तरसँग भने, ‘अस्पतालको निगरानीमा नियमित उपचार ग-यो भने उनको क्यान्सर ठिक हुनसक्छ ।’ डा साहका अनुसार रोशनीले २ वर्ष सम्म नियमित उपचार गराउनु पर्छ र चार महिना सम्म त अस्पताल नियमित आइरहन पर्छ ।
आशा छ निको हुनेब्लड क्यान्सर हुने बालबालिकामा समयमा नियमित उपचार पाएमा ४२ प्रतिशत निको हुने सम्भावना भएको डा. साह बताउछन् । आर्थिक अवस्था कमजोर भएकाले अस्पतालले रोशनीको नियमित चेकजाच, रगत परिक्षण र शैयाको शुल्क लिएको छैन । आवश्यक औषधी भने उनिले आफन्तहरुको सहयोगमा किन्दै आएकी छन् ।
छोरी रोशनीको दुई वर्षसम्म उपचार गराउदा ठिक हुने भएपनि कसरी उपचार औषधि उपचार खर्च जुटाउने भनेर सिता अन्यौलमा परेकि छिन् । ‘अहिले सम्म त माइती तिरका आफन्तले दिएको खर्चबाट औषधी किनेर खुवाउदै छु । एक महिनामा नै डेढ लाख जति खर्च भइसकेको छ, दुई वर्षसम्म कसरी खर्च जुटाउनु । केहि सोच्नै सकेको छैन ।’ उनले आफ्नो पिडा लोकान्तरलाई सुनाइन् ।
रोशनीको उपचारको लागि ६ लाख सम्म खर्च लाग्ने डाक्टर साहले बताएका छन् । तर सितासंग न त्यति धेरै पैसा छ, न त सम्पति नै । १६ वर्षको उमेर विवाह गरेकी सिताको दुई छोरी छन् । उनी एकल महिला हुन् । आफ्नी छोरीको उपचार खर्च गर्ने स्थिति नभएको सिताल बताइन् ।
‘श्रीमान् वित्नुभएको ९ वर्ष भयो । त्यो घटनालाई विर्सीएर यी दुुईछोरीको मुख हेरेर बसेकी थिए । मेलापात गरेर जसोतसो हुर्काउदै थिए, । जेठी छोरीलाई अहिले क्यान्सर भयो’ गहभरी आसु भर्दै सीताले भनिन्, ‘लोग्ने भइदिएको भए आधार हुन्थ्यो अब छोरीको उपचार खर्च कसरी जुटाऊ ?’
![](http://lktcdn.prixa.net/media/tinymce/file_manager/source/2017/Bhadau74/roshani-hospital.jpg?1505729149036)
श्रीमान् वित्दा सीता २४ वर्षकी थिइन भने छोरीहरु पाँच र एक बर्षका । श्रीमान्को मृत्यु पछि सासुले गरीखाने ३ रोपनी जति बारी दिएको भएपनि सो बारी आफनो नाममा नभएको सीताले बताइन् ।
‘सासुको खेतबारी दुबै छ मलाई बारी मात्रै दिएका छन् । त्यहि बारी पनि मेरो नाममा छैन । अर्कै संग जान्छे भनेर नामसारी गर्दिएनन् ।’ सिताले दुखेसो पोखिन्, ‘सासुले म बाचुन्जेर नामसारी गर्दिन्न भन्नुहुन्छ । आफ्नो नाममा भैदिएको भए । त्यहि बारी धितो राखेर भएपनि छोरीको उपचार गराउथे. ।’
छोरी रोशनीलाई क्यान्सर भएपछि अस्पतालमै एक महिना देखि रहकी सितालाइ अब २ वर्षसम्म छोरीको उपचार खर्च कसरी जुटाउने र आफु नै पनि कसरी बाच्ने भनेर समस्यामा परेकी छन् । छोरीको उपचारमा कसैले सहयोग गरिदिए हुन्थ्यो भन्ने आशा छ सितालाई ।
निको भएपछि स्कूल जान्छुकक्षा नौ मा पढ्दै गरेकि रोशनी अहिले अस्पतालमा उपचारत छिन् । उपचार भएपछि स्कूल जाने चाहना छ रोशनीको । ‘विरामी भएदेखि स्कूल जान पाएको छैन । स्कूल जान मन छ । डाक्टरले निको हुन्छ भन्नुभएको छ । ठिक भएपछि स्कूल जान्छु’ रोशनीले लोकान्तरलाई भनिन् ।
रोशनीलाई बचाउन
९८१३८०८८७८नम्बरमा फोन गरेर सहयोग गर्न आमा सीताले अपील गरेकी छिन् ।
Advertisment
Advertisment