निर्देशक सुरज सुनुवारको निर्देशनमा बन्न लागेको फिल्म ‘खजुरे ब्रो’को औपचारिक घोषणा गरिएको छ । 

दिब्य दृश्य इन्टरटेन्टमेन्टको ब्यानरमा बन्न लागेको फिल्मको युनिटले बंगलामुखी मन्दिर पुगेर शुभ साइत गरेको छ । कमेडी जनरामा बन्ने फिल्मको लेखक पनि  निर्देशक सुनुवार स्वयम् हुन् । सुनुवारले ८ वर्षअघि फिल्म ‘षडङ्ग’को निर्देशन गरेका थिए । ‘खजुरे ब्रो’उनको कमब्याक फिल्म हुनेछ । 

नवीन मानन्धर र सुरज सुनुवारले निर्माण गर्ने फिल्मका कार्यकारी निर्माता डायमण्ड उप्रेती हुन् । शिशिर बिसंखेले छायाँकन गर्ने फिल्म माघ पहिलो साताबाट फ्लोरमा जानेछ । फिल्ममा अभिनय गर्ने कलाकार तथा अन्य प्राविधिकहरूको नाम भने निर्माण टिमले गोप्य नै राखेको छ । 

अहिलेको दर्शकहरुको चाहनाअनुसार पूर्ण मनोरञ्जन दिने उद्देश्यका साथ फिल्म निर्माण गर्न लागिएको कलाकार तथा निर्माता नवीन मानन्धरले बताए । फिल्ममा अनमोल गुरुङको संगीत रहनेछ । इटहरी, धरान, दार्जिलिङ र काठमाडौँमा फिल्मको छायाँकन गरिने जनाइएको छ ।