‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
००००
शुक्रबार भएको बालकुमारी घटनालाई लिएर सरकारको तीव्र आलोचना भएको छ । यस्तै सरकारले पनि घटनालाई गम्भीरतापूर्वक लिँदै जिम्मेवार अधिकारीमाथि आवश्यक कारबाही अघि बढाएको छ । जसअनुसार गृह मन्त्रालयले ललितपुरका प्रमुख जिल्ला अधिकारी रुद्रप्रसाद पण्डितलाई मन्त्रालय तानेको छ ।

यस्तै, गृहले जिल्ला प्रहरी परिसर ललितपुरका प्रहरी वरिष्ठ उपरीक्षक  सिद्धिविक्रम शाहलाई नेपाल प्रहरी प्रधान कार्यालयमा फिर्ता गरेको छ ।

घटनास्थलमा सुरक्षा कमाण्डको जिम्मेवारीमा खटिएका जिल्ला प्रहरी परिसर ललितपुरका प्रहरी नायब उपरीक्षक उमेश लम्साल र भौतिक पूर्वाधार तथा यातायात मन्त्रीको सुरक्षामा खटिएका व्यक्तिगत सुरक्षा अधिकृत प्रहरी सहायक निरीक्षक बोधराज दनुवारलाई निलम्बन गरिएको मन्त्रालयले जनाएको छ ।
००००
सरकारले ललितपुरको बालकुमारी क्षेत्रमा शुक्रवार भएको दुई जनाको ज्यान जाने घटनालाई दुःखद् भनेको छ । शनिबार बसेको मन्त्रिपरिषद् बैठकले मृतकका परिवारलाई जनही १० लाख दिने निर्णय गरेको जानकारी सरकारकी प्रवक्ता रेखा शर्माले दिइन् । शुक्रबार बालकुमारीको झडपमा दैलेखका सुजन राउत र अछामका वीरेन्द्र शाहको दुःखद् निधन भएको थियो । 
००००
ललितपुरको बालकुमारीमा भएको घटनाको विरोधमा काठमाडौंको माइतीघरमा विरोध प्रदर्शन भएको छ । विभिन्न राजनीतिक दलका युवाहरूले शनिवार माइतीघरमा प्रदर्शन गरेका हुन् । यस्तै बुटवल, सुर्खेत, दैलेख लगायतका स्थानमा पनि विरोध प्रदर्शन भएको छ ।

ईपीएस परीक्षामा फाराम भर्ने विषयमा भएको विवादमा भएको झडपमा दुई जनाको मृत्यु भएसँगै सरकारको आलोचना भइरहेको छ।  प्रहरीको लापरबाहीले अनाहकमा दुई युवाले ज्यान गुमाउनु परेको आरोप लागेको छ । 
००००
यस्तै प्रधानमन्त्री पुष्पकमल दाहाल ‘प्रचण्ड’सँग ललितपुरको बालकुमारीमा शुक्रबार भएको घटनाका पीडित परिवारजनले भेट गरेका छन् । प्रधानमन्त्री निवास बालुवाटारमा शनिबार भएको उक्त भेटमा प्रधानमन्त्री दाहालले घटनाको यथार्थ पत्ता लगाउन सरकारले छानबिनको प्रक्रिया अघि बढाइसकेको र दोषी देखिएकालाई कारबाही गरिने प्रतिबद्धता व्यक्त गरे । 
००००
काठमाडौं जिल्ला अदालतको फैसलाविरुद्ध क्रिकेटर सन्दीप लामिछाने पुनरावेदनका लागि उच्च अदालत, पाटन जाने भएको छ ।

अदालतको निर्णयबाट असन्तुष्ट भएका लामिछाने पुनरावेदनका लागि उच्च अदालत जाने उनका एक वकिलले बताए ।
लामिछाने जिल्ला अदालत काठमाडौंबाट शुक्रवार मात्रै जबरजस्ती करणीको मुद्दामा दोषी ठहर भएका थिए । 

न्यायाधीश शिशिरराज ढकालको इजलासले जबरजस्ती करणीको मुद्दामा किशोरी साबालिग रहे पनि लामिछाने दोषी रहेको ठहर गरेको थियो ।
००००
जनता समाजवादी पार्टी नेपालले आगामी पुस २५ र २६ गतेको राजनीतिक समितिको बैठक र पुस २७ गते बस्ने केन्द्रीय समिति बैठकको कार्यसूचि तय गरेको छ । 

बैठकमा प्रस्तुत हुने चारवटा विषयसूची निर्धारण गरिएको प्रचार विभाग प्रमुख पूर्ण बस्नेतले जानकारी दिए ।
००००
मोहन वैद्यले नेतृत्व गरेको क्रान्तिकारी कम्युनिष्ट पार्टीले ललितपुरको बालकुमारीमा दुई युवाको मृत्यु भएको घटनाको भत्र्सना गरेको छ । सो पार्टीका प्रवक्ता कञ्चनले शनिबार विज्ञप्ति जारी गर्दै यही विषयसहित जनजीविकाको सवाललाई लिएर चक्काजामसहितको संकर्षको कार्यक्रम घोषणा गरिएको जानकारी दिए ।
००००
नेपाली कांग्रेसले पटक पटक अवसर पाएकालाई राष्ट्रिय सभामा उम्मेदवार नबनाउने निर्णय गरेको छ । 

केन्द्रीय कार्यालय सानेपामा तीन दिनसम्म बसेको बैठकले लामो समय पार्टीमा योगदान गरेका, अवसर नपाएकालाई राष्ट्रिय सभामा उम्मेदवार बनाउने गरी मापदण्ड बनाएको जानकारी पार्टी प्रचार विभाग प्रमुख मीन विश्वकर्माले दिए ।
००००
यसैगरी सभापति शेरबहादुर देउवाले राष्ट्रिय सभामा सबैलाई पद दिन नसक्ने भन्दै चित्त नदुखाउन नेताहरूलाई आग्रह गरेका छन् । 

शनिवार केन्द्रीय समितिको बैठक समापन गर्दै देउवाले गठबन्धन सरकारको बाध्यता बुझिदिन पनि आग्रह गरे । 
‘राष्ट्रिय सभामा थोरै सिट छ । हामी गठबन्धनमा छौँ, त्यसैले सबैलाई उम्मेदवार बनाउन सक्दैनौँ । सबैलाई पद दिन सकिँदैन । चित्त नदुखाउनुहोला’ देउवाले भने, ‘पार्टी बलियो बन्न एक भएर जानुपर्छ, पार्टी भित्र एकता चाहिन्छ ।’
००००
६ प्रदेशका मुख्यमन्त्रीहरूले प्रधानमन्त्री पुष्पकमल दाहाल प्रचण्डलाई भेटेका छन् । शनिबार बिहानै उनीहरूले सरकारी निवास बालुवाटार पुगेर प्रधानमन्त्री प्रचण्डलाई भेटेका हुन् । 

भेटमा मुख्यमन्त्रीहरूले प्रधानमन्त्रीलाई सात बुँदे ध्यानाकर्षण पत्र बुझाएका छन् । उनीहरूले नेपालको संविधानमा व्यवस्था भएका साझा अधिकार सूची प्रयोगको व्यवस्था मिलाउन, गत असारमा पोखरामा सम्पन्न मुख्यमन्त्री सम्मेलनको निष्कर्ष कार्यान्वयन गर्न सरकारको ध्यानाकर्षण गराएका छन् ।
००००
नेपाल विद्युत् प्राधिकरणले विगतमा डेडिकेटेड फिडर एवम् ट्रंक लाइनबाट विद्युत् उपभोग गरेका तर त्यसबापतको प्रिमियमसहितको महसुल नतिरेका थप १४ वटा उद्योगहरूको विद्युत् आपूर्ति विच्छेद गरेको छ । प्राधिकरणले ५ करोड रुपैयाँभन्दा बढी बिद्युत् बक्यौता भएका ग्राहकहरूको विद्युत् लाइन काटेको हो ।