अख्तियार दुरुपयोग अनुसन्धान आयोगले विशेष अदालतको फैसलाविरुद्ध सर्वोच्च अदालतमा पुनरावेदन मुद्दा दर्ता गरेको छ ।

कर निर्धारण गर्दा अनियमितता गरी भ्रष्टाचार गरेको मुद्दामा विशेष अदालतको फैसलाविरुद्ध मंगलवार सर्वोच्चमा पुनरावेदन मुद्दा दर्ता गरिएका आयोगले जनाएको छ ।

आयोगका सहायक प्रवक्ता देवीप्रसाद थपलियाका अनुसार प्रतिवादीहरू लुम्बध्वज महत, उमेशप्रसाद ढकाल र चुडामणि शर्मा ढकाल तथा कर फर्छ्यौट आयोगका पदाधिकारीहरू विरुद्धको मुद्दामा विशेषको फैसलाविरुद्ध आयोग सर्वाेच्च पुगेको हो ।

विशेष अदालतले आयोगका अध्यक्ष महत तथा सदस्यहरू ढकाल र शर्मालाई कर फर्छ्यौट आयोगमा रहेर काम गर्दा राजस्व चुहावट गरी भ्रष्टाचार गरेको अभियोगमा दोषी ठहर गरेको थियो ।

विशेषले उनीहरूलाई जनही २ अर्ब ५ करोड २३ लाख बिगो अनि थप ४ अर्ब १० करोड रुपैयाँ तिराउनुपर्ने फैसला गरेको थियो ।

उनीहरूले १० अर्ब २ करोड १९ लाख रुपैयाँ राजस्व चुहावट गरी भ्रष्टाचार गरेको अख्तियारको दाबी गर्दै अख्तियारले विशेष अदालतमा मुद्दा दायर गरेको थियो ।

अख्तियारले दाबी गरे अनुसारको फैसला नभएपछि सर्वोच्चमा पुनरावेदन गरिएको आयोगका सहायक प्रवक्ता देवीप्रसाद थपलियाले जानकारी दिएका छन् ।