‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
काठमाडौं महानगरपालिका वडा नम्बर– ३ बाँसबारीमा शहीद गंगालाल राष्ट्रिय हृदय केन्द्रनजिकै सञ्चालनमा छ, द चाँदबाग स्कूल ।
विनोद चौधरी नेतृत्वको सीजी ग्रुपअन्तर्गत सीजी एजुकेसनले सञ्चालन गरेको उक्त स्कूल त्यही १० रोपनी जग्गामा अवस्थित छ, जुन विनोद चौधरीलगायतले विभिन्न तिकडम गरी हडपेका थिए ।

महाराजगञ्ज चोकबाट झण्डै डेढ किलोमिटरको दूरीमा रहेको बाँसबारीलाई अहिले ुप्राइम लोकेसनु मानिन्छ । भीआईपी बस्ती र बढ्दो सेवा सुविधाका कारण यस क्षेत्रमा जग्गाको मूल्य छोइनसक्नु छ ।

जनप्रतिनिधि तथा स्थानीय बासिन्दाको कुरालाई आधार मान्दा विनोद चौधरी र उनको परिवारले हडपेको सो जग्गाको हालको मूल्य २ अर्ब हाराहारीमा पर्ने देखिएको छ । काठमाडौं महानगरपालिका– ३ का वडाध्यक्ष प्रेमकुमार थापाले सो जग्गाको मूल्य प्रतिआना १ करोडभन्दा माथि रहेको बताए ।
००००
नेपाल मजदुर किसान पार्टी (नेमकिपा) का सांसद प्रेम सुवालले बाँसबारी छालाजुत्ता कारखानाको जग्गा हिनामिना प्रकरणमा कांग्रेस सांसद विनोद चौधरीको संलग्नता रहेको बताएका छन् । यस सम्बन्धमा पार्टीको धारणा सार्वजनिक गर्न उनले कांग्रेसको ध्यानाकर्षण गराए । 

बुधबार बसेको प्रतिनिधि सभा बैठकको विशेष समयमा सांसद सुवालले उद्योगीको भेषमा चौधरी ग्रुपले बाँसबारीको जग्गा हडपेको सम्बन्धमा कांग्रेसको धारणा माग गरेका हुन् ।  
००००
बाँसबारी छाला जुत्ता कारखानाको जग्गा हिनामिना प्रकरणमा पक्राउ परेका च्याम्पियन फुटवेयर लिमिटेडका सञ्चालक तथा व्यवसायी अरुण चौधरीसहित तीनै जना रिहा भएका छन् ।

काठमाडौं जिल्ला अदालतको आदेशअनुसार चौधरीसहित बाँसबारी छाला जुत्ता कारखाना लिमिटेडका तत्कालीन कार्यकारी अध्यक्ष अजिनारायण सिंह थापा र सीजी चाँदबाग रेसिडेन्सी प्रालिका सञ्चालक सञ्जय ठाकुर हाजिरी जमानीमा रिहा भएका हुन् । उनीहरु रिहा भएपनि जग्गा घोटाला प्रकरणमा अनुसन्धान निरन्तर हुनेछ । 
००००
जनमत पार्टीका सांसद अब्दुल खानले विकास निर्माणको काममा ढिलाइ भए संसद्भित्र अनसन बस्ने चेतावनी दिएका छन् ।
बुधवार बसेको प्रतिनिधि सभा बैठकको शून्य समयमा सांसद खानले विकास निर्माणका काम ढिलाइ भए अनसन बस्ने चेतावनी दिएका हुन् ।
००००
राष्ट्रिय स्वतन्त्र पार्टी (रास्वपा)का सभापति रवि लामिछानले सरकारी जग्गा किर्ते गर्ने र सरकारी ठगीमा संलग्नलाई कारबाही गर्न कसले रोक्यो भनी सत्तापक्षसँग प्रश्न गरेका छन् ।

बुधवार प्रतिनिधि सभा बैठकको विशेष समयमा सभापति लामिछानेले लामो समय सरकारमा रहेका दलका सांसदले नयाँ दलप्रति छेडखानी गरेको भन्दै आक्रोश पोखेका हुन् ।
००००
६० किलो सुन तस्करीमा संलग्न भएको आरोपमा अमला रोकाविरुद्ध डिफ्युजन नोटिस भएको छ ।

अन्तर्राष्ट्रिय प्रहरी सङगठन ‘इन्टरपोल’ले रोकाविरुद्ध डिफ्युजन नोटिस जारी गरेको प्रहरीको केन्द्रीय अनुसन्धान ब्यूरो (सीआईबी)का प्रवक्ता तथा प्रहरी उपरीक्षक नवराज अधिकारीले जानकारी दिए ।
००००
गिरिबन्धु टी स्टेटलाई हदबन्दीभन्दा बढीको जग्गा सट्टाभर्ना गर्न दिने भनी तत्कालीन सरकारले गरेको निर्णय सर्वोच्च अदालतले बदर गरिदिएको छ ।

संवैधानिक इजलासले केपी शर्मा ओली नेतृत्वको तत्कालीन सरकारले २०७८ वैशाख १३ गते गरेको निर्णय बुधवार बदर गरिदिएको हो ।
००००
संसद्का नवनियुक्त महासचिव पद्मप्रसाद पाण्डेयले पद तथा गोपनीयताको शपथ ग्रहण गरेका छन् । उनलाई बुधबार बिहान सभामुख देवराज घिमिरेले शपथ खुवाएका हुन् ।

यसअघि प्रतिनिधि सभाका सचिव रहेका उनलाई राष्ट्रपति रामचन्द्र पौडेलले मंगलबारबाटै लागु हुने गरी संसद्को महासचिवमा नियुक्त गरेका थिए ।
००००
प्रदेशको नामकरण पहिचानका आधारमा फेरि गर्न माग गर्दै आन्दोलन गरिरहेको पुनः नामकरण संयुक्त संघर्ष समिति कोशी प्रदेश सरकारसँग वार्ता गर्न तयार भएको छ । 

कोशी प्रदेश सरकारले वार्तामा आउन आह्वान गर्दै औपचारिक पत्र पठाएको लामो समयसम्म आन्दोलनरत पक्षले पत्रको जवाफ नफर्काएर संशय पैदा भएको बेला समितिले बुधवार वार्ता गर्ने निर्णय गरेको हो ।
००००
१ लाख रुपैयाँ घुस लिएको आरोपमा नापी कार्यालय कलंकीका सर्भेक्षक  पक्राउ परेका छन् । अख्तियार दुरुपयोग अनुसन्धान आयोगको टोलीले बुधबार सर्भेक्षक लक्ष्मी प्रसाद चौलागाई र राजधानी लेखापढी सेवा’का लेखापढी कर्मचारी नेत्रमणी पोखरेल समेतलाई पक्राउ गरेको हो ।
००००
नेपाली राष्ट्रिय क्रिकेट टोलीका कप्तान रोहितकुमार पौडेलले क्यानडासँगको शृंखलाका लागि विशेष तयारी गर्न नपाएपछि राम्रो नतिजा निकाल्ने प्रयास गर्ने बताएका छन् । 

क्यानडासँगको शृंखलाअघि बुधवार आयोजित पत्रकार सम्मेलनमा कप्तान रोहितले यस्तो प्रतिक्रिया दिएका हुन् ।
 युवा खेलाडीसम्मिलित टोली राम्रो भएको प्रतिक्रिया दिँदै उनले सियिनर खेलाडी प्रधानमन्त्री कपमा ब्यस्त हुनु र जुनियर पनि भर्खरै यू–१९ विश्वकप खेलेर फर्किएकाले सँगै रहेर विशेष तयारी गर्न नपाएको स्पष्ट पारे ।
००००
सांसदहरूले सवारीसाधन दुर्घटना न्यूनीकरणका उपायसहित संसद्मा जरुरी सार्वजनिक महत्वको प्रस्ताव दर्ता गराएका छन् ।
बुधवार संसद्मा प्रस्ताव दर्ता गराइएको राष्ट्रिय स्वतन्त्र पार्टी (रास्वपा)की सांसद निशा डाँगीले जानकारी दिइन् ।
सचेतकसमेत रहेकी डाँगीले आफ्नै पार्टीका सांसद सन्तोष परियारलाई लिएर रास्वपाकी सभामुख देवराज घिमिरेकहाँ गइ प्रस्ताव दर्ता गराएकी हुन् ।
००००
नेपाल स्टक एक्सचेन्ज (नेप्से) परिसूचकमा सामान्य अङ्कको सुधार देखिएको छ । बुधबार नेप्से परिसूचक ४ दशमलव ९२ अङ्कले बढेर २ हजार ९० दशमलव ६४ को विन्दुमा कायम भएको हो ।

बुधबार विभिन्न तीन सय १३ कम्पनीका ७७ लाख ३२ हजार दुई सय ३४ कित्ता शेयर ६५ हजार चार सय ६३ पटक खरिद बिक्री हुँदा रु २ अर्ब ८४ करोड २५ लाख ५० हजार दुई सय ३७ बराबरको कारोबार भएको छ ।
००००
कोशी प्रदेशका मुख्यमन्त्री केदार कार्कीले एक विद्यालयमा दिएको अभिव्यक्तिको चर्को विरोध हुन थालेको छ । मोरङको सुन्दरहरैचा नगरपालिकाको साजिलाल माध्यमिक विद्यालयको वार्षिक उत्सवका कार्यक्रममा उनले दिएको अभिव्यक्ति विवादमा तानिएको हो । 

दुई दिनअघि उनले गरेको भाषणको भिडियो सामाजिक सञ्जालमा भाइरल बनिरहेको छ । ‘म पनि लास्ट बेन्चमै बस्ने विद्यार्थी हुँ । फस्ट बेच्नमा बस्नेले केबल लेख्न पढ्न मात्र जान्यो, ऊ अहिले खरिदार छ म अहिले मुख्यमन्त्री छु । उसले कसरी हुन्छ भुँडी भर्न मात्र जान्यो ’ उनले भनेका छन् ।