टाटाका लागि नेपालको आधिकारिक वितरक सिप्रदी ट्रेडिङले भारतमा मूल्य घटेको भनिएको नेक्सन इभी नेपालमा लन्च नभएको जनाएको छ ।

भारतमा मूल्य घटेपछि नेपाल के हुन्छ भन्ने चासो बढेको छ तर भारतमा मूल्य घटेको भनिएको नेक्सन इभीको नयाँ भेरिएन्ट नेपालमा नआएकाले यहाँ मूल्य घट्ने या बढ्ने अवस्था नरहेको सिप्रदीको भनाइ छ ।

टाटा मोटर्स कम्पनीले आफ्नो ‘टप सेलिङ’ इलेक्ट्रिक गाडी नेक्सन इभी के-३ मोडलको मूल्य १ लाख २० हजार रुपैयाँसम्म घटाएको छ । मूल्य घटाएसँगै अब नेक्सन इभी (सटरेन्ज)को मूल्य १४ लाख ४९ हजार रुपैयाँ कायम भएको छ भने लङ रेन्जको सुरुआती मूल्य १६ लाख ९९ हजार कायम गरिएको टाटाले जानकारी दिएको छ ।

त्यसैगरी कम्पनीले फास्टेस्ट सेलिङ कार टियागो इभी सबैभन्दा सस्तो भेरियन्टको मूल्य पनि घटाएको छ । टाटा मोटर्सले यसको मूल्य ७० भारु हजार घटाएको हो । मूल्य घटेपछि यसको मूल्य ७ लाख ९९ हजार  भारु कायम गरिएको छ । भारतमा मूल्य घटेपछि नेपालमा यी गाडीको मूल्य के हुन्छ भन्ने चासोको विषय बनेको हो ।

यसबारे प्रतिक्रिया दिँदै टाटा मोटर्सका एक अधिकारीले लोकान्तरसँग भने, 'भारतमा मूल्य घटेको भनिएको नेक्सन इभीको नयाँ भेरिएन्ट नेपालमा लन्च भएको छैन । नेपालमै नआएको गाडीको मूल्य भारतमा घट्ने बढ्ने हुँदा यहाँ केही असर हुँदैन ।'

टाटाले नेपालमा नाडा अटो शोदेखि अहिलेसम्मै ‘इन्टडक्टरी’ मूल्यमा गाडी दिइरहेको र बीचमा भारतमा मूल्य बढ्दा पनि नेपालमा नबढेको उनको तर्क छ । त्यसकारण तत्काल टियागोको मूल्य घटाउन सक्ने अवस्था नरहेको उनको भनाइ छ । यद्यपि भारतमा ७० हजार मूल्य बढेको भनिएको टियागो पनि नेपाल नआइसकेको ती अधिकारीले दाबी गरे ।

'भारतीय बजारमा उनीहरूको आफ्नो हिसाबले प्रतिस्पर्धा हुन्छ, नेपाली बजारमा हाम्रो हिसाबले प्रतिस्पर्धा हुन्छ,' ती अधिकारी भन्छन्, 'त्यसकारण त्यहाँ मूल्य घट्यो भन्दैमा यहाँ तत्काल घटिहाल्नु पर्छ भन्ने छैन ।'