विराटनगरमा जारी दोस्रो संस्करणको विराटनगर हब अन्तरविद्यालय छात्रा क्रिकेट प्रतियोगितामा लगातार ४ खेलमा विजयी हुँदै सरस्वती स्कूल र बालिका स्कूल फाइनलमा प्रवेश गरेका छन् ।

नेपाल क्रिकेट फाउण्डेसन र क्रिकेट विथआउट वाउन्ड्रीको सहयोगमा विराटनगर– ६ स्थित ज्वाला क्रिकेट मैदानमा शुक्रवार भएका खेलमा सरस्वती र बालिका विजयी भएका हुन् । 

पहिलो खेलमा सरस्वती स्कूलले महेन्द्र स्कूललाई ६४ रनले पराजित गरेको छ । 

सरस्वतीले दिएको १२२ रनको विजयी लक्ष्य पाएको महेन्द्रले निर्धारित ओभरमा ७ विकेट गुमाएर ५७ रन मात्र बनाउन सक्यो । जसमा शिवानी खातुनले सर्वाधिक ६ रनको योगदान दिइन् । सरस्वतीका चाँदनी यादव र अञ्जली मण्डलले २–२ विकेट लिइन् ।

यसअघि टस जितेर ब्याटिङ गरेको सरस्वतीले निर्धारित १६ ओभरमा ६ विकेट गुमाएर १२१ रनको योगफल बनाएको थियो ।

 जसमा प्लेयर अफ दी म्याचसमेत भएकी कृतिषा धामीले सर्वाधिक ४३ रनको योगदान दिइन् । 

यस्तै महेन्द्रकी धनवन्ती रायले १ विकेट लिइन् । 

दोस्रो खेलमा वालिका स्कूलले आदर्श स्कूललाई ३५ रनले पराजित गरेको छ । १११ रनको विजयी लक्ष्य पाएको आदर्श निर्धारित ओभरमा ४ विकेट गुमाइ ७५ रनमा सीमित भयो । जसमा करुणा राजवंशीले सर्वाधिक १८ रनको योगदान दिइन् । बालिकाकी बबिता गुप्ताले २ विकेट लिइन् ।

यसअघि टस जितेर ब्याटिङ गरेको बालिकाले निर्धारित १६ ओभरमा ४ विकेट गुमाएर ११० रन बनाएको थियो । जसमा प्लेयर अफ दी म्याच बुदिता राजवंशीले सर्वाधिक ३० रन बनाउँदा सकुन्तला सहनीले २५ रन जोडेकी थिइन् । आर्दशकी अपर्णा राजवंशीले २ विकेट लिइन् ।

अब बालिका र सरस्वतीले उपाधि भिडन्त गर्नेछन् ।