युरो कप २०२४ खेल्ने २४ देशको टुंगो लागेको छ । गएराति सम्पन्न युरो कप छनोटका प्लेअफ खेलमा जीत हसिल गर्दै जर्जिया, युक्रेन र पोल्याण्डले युरो कपमा आफ्नो स्थान सुरक्षित गरेसँगै युरो कप खेल्ने २४ टिमको टुंगो लागेको हो । 

युक्रेनले आइसल्याण्डलाई २-१ गोल अन्तरले पराजित गर्‍यो । त्यस्तै, पोल्याण्डले वेल्सलाई पेनाल्टी सुटआउटमा ५-४ गोलले पराजित गर्दै युरो कपमा स्थान बनाएको हो । त्यस्तै, जर्जियाले ग्रीसलाई पेनाल्टी सुटआउटमा ४-२ ले पराजित गर्दै युरोकपमा पुगेको हो । 

जर्जियाले पहिलोपटक  युरो कपमा स्थान बनाएको हो । 

पोल्याण्ड समूह डी मा परेको छ । समूहमा नेदरल्याण्ड्स, अस्ट्रिया र फ्रान्ससँग रहने छ भने युक्रेन समूह इ मा परेको छ । समूहमा बेल्जियम, स्लोभाकिया, रोमानियासँग रहने छ।

त्यस्तै, युरोकपको समूह ए मा आयोजक जर्मनी, स्कटल्याण्ड, हंगेरी, स्वीजरल्याण्ड रहेका छन् भने समूह बी मा स्पेन, क्रोएसिया, इटाली र अल्बानिया रहेका छन् ।

त्यसैगरी, समुह सी मा स्लोभेनिया, डेनमार्क, सर्बिया र इङल्याण्ड रहेका छन् भने समूह एफमा टर्की, जर्जिया, पोर्चुगल र चेक रिपब्लिक रहेका छन्।

युरो कप आगामी जुन १४ देखि जुलाई १४ सम्म जर्मनीमा हुँदैछ।