राष्ट्रिय सतर्कता केन्द्रले खानेपानी मन्त्रालयका सचिव सुरेश आचार्यसहित तीन जनालाई कारबाही गर्न अख्तियार दुरुपयोग अनुसन्धान आयोगलाई पत्राचार गरेको छ ।

बिदामा बसेका बेला कूटनीतिक राहदानीको दुरुपयोग गरी मन्त्रालयको नेतृत्व गर्दै भारत भ्रमणमा गएका सचिव आचार्यलाई राहदानी दुरुपयोग कसुरमा कारबाही गर्न पत्राचार गरिएको हो ।

सतर्कता केन्द्र स्रोतका अनुसार सचिव आचार्यलाई राहदानी ऐन, २०७६ बमोजिम आवश्यक कारबाही गर्न अख्तियारलाई सोमवार पत्राचार गरिएको हो ।

त्यसै गरी भारत भ्रमणमा सहसचिवको ठाउँमा तत्कालीन खानेपानी मन्त्री महिन्द्रराय यादवले आफ्नो छोरा सुनिल अधिकारी यादवलाई पठाएकोमा आचार संहिता अन्तर्गतको कारबाहीका लागि केन्द्रले सिफारिस गरेको हो । 

त्यसै गरी घर बिदा लिएर उक्त भ्रमणमा सहभागी भएका सीडीई देवेन्द्र झालाई पनि विभागीय कारबाहीका लागि सिफारिस गरिएको केन्द्रका एक कर्मचारीले जानकारी दिए ।

'केन्द्रका सचिव रामआधार साहको सचिव स्तरीय निर्णयअनुसार आवश्यक कारबाही गर्न आयोगलाई पत्राचार गरिएको हो,' ती कर्मचारीले लोकान्तरसँग भने ।

सचिवको अक्षम्य अपराधः सरकारले स्वीकृति नदिएपछि घरबिदा लिएर विदेशमा सरकारी प्रतिनिधित्व !

खानेपानी सचिव आचार्यले कूटनीतिक राहदानी दुरुपयोग गरेको पुष्टि