नेकपा एमालेका अध्यक्ष केपी शर्मा ओलीले देशलाई अगाडि बढाएर गरिबी नहटाएसम्म आफूले राजनीतिबाट सन्यास नलिने बताएका छन् । 

उनले एमालेविनाको नेपाल र केपी ओलीविनाको एमाले भन्नेप्रति दया लाग्ने टिप्पणी गरे । 

एमाले कास्कीको ११ औं जिल्ला सम्मेलनबाट निर्वाचित पदाधिकारीको शपथ कार्यक्रमलाई शुक्रबार पोखरामा सम्बोधन गर्दै ओलीले अरू २० वर्ष राजनीतिमा सक्रिय रहने बताएका हुन् ।

‘कसैले एमालेविनाको नेपाल भने, कठै माया लाग्यो । कसैले ओलीविनाको एमाले भने दया लाग्छ । केपी ओली नभइदिएदेखि यसो गरौंला भन्ने लागेको होला, मैले पोहोर साल भनेको थिएँ– जुंगा कालाकाला हुन लागे भनेर । मेरो कपाल जम्मै झरेको थियो । अहिले आफैँ पलाउन थालेको छ, रोपेको होइन । अस्ति नै भनेको थिएँ २० वर्ष अरू कसैले आस नगरे हुन्छ,’ ओलीले भने, ‘यो देशलाई अगाडि बढाएर देशबाट गरिबी हटाएपछि मात्र चौतारोमा बसेर सुस्केरा हाल्ने समय आउँछ । अहिले हामीलाई समय छैन, व्यस्त छौं ।’

ओलीले सक्रिय राजनीतिबाट विश्राम लिएपछि आफूलाई पार्टीमा वरिष्ठ नेता भन्दै पद नचाहिने बताए ।

‘पार्टी अध्यक्ष र प्रधानमन्त्री भइसकेका नेता (झलनाथ)ले हैसियत खोज्दै हिँडेको थाहा छ, माधव नेपालले मलाई के हुन्छ भन्नुहुन्छ ?’ ओलीले भने, ‘जेलमा रहेका नेतालाई ल्याएर जनताले सांसद, प्रधानमन्त्री र पार्टी अध्यक्ष बनाइसकेपछि मलाई के चाहियो ? सकेजति काम गर्छु, छाडेपछि वरिष्ठ नेता भनेर छेउमै बस्ने रूचि छैन ।’ 

ओलीले २०८४ सालको चुनावमा एमाले एक्लैले बहुमत ल्याउने गरी मिसन– २०८४ को अभियानमा लागेको बताए ।