राष्ट्रिय स्वतन्त्र पार्टी (रास्वपा)का सभापति एवं उपप्रधान तथा गृहमन्त्री रवि लामिछानेले आफ्नो पार्टीमा जनता झुक्याएर खानुपर्ने एकजना पनि नेता नभएको बताएका छन् । 

शनिवार इलाम- २ मा पार्टीका उम्मेदवार रहेका मिलन लिम्बूको चुनावीसभालाई सम्बोधन गर्दै उनले ठगेर खानुपर्ने मान्छे आफ्नो पार्टीमा नभएको दाबी गरेका हुन् ।

‘यत्तिकै बोलेर हिँड्ने, जनता झुक्याएर खानुपर्ने एउटा नेता पनि हाम्रो पार्टीमा छैन,’ उनले भने, ‘काम नै गरेर खानसक्ने नेता मात्र हाम्रो पार्टीमा छन् ।’

पुराना दलका कारण नागरिक शिक्षा, स्वास्थ्य जस्ता आधारभूत विषयबाट बञ्चित भएको आरोप पनि लामिछानेले लगाए । 

‘पुराना दलले नारा लगाइरहेका छन् । नारा घोषणापत्र तपाईंहरूले हेर्नुभएको छ । आज तपाईंलाई रोग लाग्यो भने उपचार गर्ने पैसा छैन । खरखेत नबेची, छिमेकीसँग ऋण नमागी उपचार हुँदैन । पैसा नभएकाले उपचार नपाउने र बच्चालाई पढाउन नपाउने अवस्था छ’ उनले भने, ‘धनीले मात्रै उपचार गर्ने र बच्चा पढाउन पाउने अवस्था मुलुकले कहिलेसम्म बेहोर्ने ?’

शिक्षा र स्वास्थ्य क्षेत्र राम्रो गर्ने विषयलाई रास्वपाले पहिलो प्राथमिकतामा राख्ने उनले बताए ।