बाबरको कप्तानीमा पाकिस्तानको टोली घोषणा, इमाद वासिम र मोहम्मद आमिरको कमब्याक

पाकिस्तान क्रिकेट बोर्डले आईसीसी पुरुष टी–२० विश्वकप २०२४ का लागि १५ सदस्यीय टोलीको घोषणा गरेको छ । बोर्डले शुक्रबार बाबर आजमको कप्तानीमा १५ सदस्यीय टोलीको घोषणा गरेको हो । टी–२० विश्वकप जुन १ देखि अमेरिका र वेस्ट इन्डिजमा शुरू हुन्छ । 

टोलीमा रहेका १५ खेलाडीमध्ये अबरार अहमद, आजम खान, मोहम्मद अब्बास अफ्रिदी, साइम अयुब र उस्मान खानको लागि यो पहिलो विश्वकप हुनेछ। मोहम्मद आमिर र इमाद वासिमले कमब्याक गरेका छन् । दुवै अन्तिमपटक २०१६ र २०२१ को विश्वकपमा देखिएका थिए ।

पीसीबीले यो युवा र अनुभवको मिश्रण भएको धेरै प्रतिभाशाली र सन्तुलित टोली भएको बताएको छ । 

पाकिस्तान विश्वकपमा सबैभन्दा प्रभावशाली टोलीमध्ये एक हो। टोलीले युनिस खानको कप्तानीमा २००९ को विश्वकप जितेको थियो । शोएब मलिक (२००७) र बाबर आजम (२०२२) को नेतृत्वमा दुई पटक फाइनलमा पुगेको थियो । 

पाकिस्तानको १५ सदस्यीय टोली
बाबर आजम (कप्तान), मोहम्मद रिजवान, सईम अयुब, फखर जमान, उस्मान खान, आजम खान, इफ्तिखार अहमद, इमाद वासिम, शादाब खान, मोहम्मद आमिर, शाहीन शाह अफ्रिदी, नसीम शाह, अब्बास अफ्रिदी, हरिस रउफ र अबरार अहमद।