देउवासँग दूरी घटाउँदै प्रचण्ड, झण्डै तीन महिनापछि भेटे घरमै पुगेर

फागुन २१ मा नेकपा (एमाले)सँगको नयाँ गठबन्धन बनाएसँगै प्रधानमन्त्री पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवाबीचको दूरी बढेको थियो । अहिले फेरि यी दुईबीच दूरी घटेको संकेत देखिएको छ ।

प्रधानमन्त्री प्रचण्डले आज (आइतबार) घरमै गएर देउवालाई भेटेपछि दूरी घटेको संकेत मिलेको हो ।  उपप्रधान तथा गृहमन्त्री रवि लामिछाने पनि मुछिएको भनिएको सहकारी ठगी प्रकरण यतिबेला पेचिलो बन्दै छ । यो मुद्दा संसद्हुँदै सडकसम्म पुगिसकेको छ । 

यसअघि संसद्मा सीमित भएको प्रतिपक्षी कांग्रेस आजदेखि सडक संघर्षमै जाँदैछ । यस्तोमा सत्तापक्षलाई नीति तथा कार्यक्रम पारितलगायत सबै संसदीय प्रक्रिया अगाडि बढाउन चुनौती छ । 

यसै मेसोमा छानबिनका लागि गठन गरिने भनिएको संसदीय छानबिन समितिको कार्यादेश (टीओआर) टुङ्गो लगाउन आजै ठूला दलका शीर्ष नेताको बैठक बस्दैछ । यसअघि प्रधानमन्त्री प्रचण्डले कांग्रेसका सभापति देउवालाई घरमै पुगेर भेट्नुपर्ने अवस्था सिर्जना भएको हो । 

बूढानीलकण्ठस्थित देउवा निवासमा आज बिहान दुई नेताबीच छलफल भएको कांग्रेस स्रोतले जनाएको छ ।

प्रचण्ड झण्डै तीन महिनापछि देउवा निवासमा देखिएका छन् । सँगसँगै यसले कतै नयाँ राजनीतिक कोर्सको कसरत त हुन आँटेको होइन भन्ने शंका उब्जिएको छ ।

कार्यादेश टुङ्गो लगाउनअघि प्रचण्ड र देउवाबीच छलफल