गठन भएको एक सातापछि बस्यो संसदीय छानबिन समिति बैठक, सभामुख पनि सहभागी

सहकारीको रकम अपचलन सम्बन्धमा छानबिन गर्न गठित संसदीय समितिको बैठक गठन भएको एक सातापछि बुधबार दिउँसो बसिरहेको छ ।

काठमाडौंको नयाँ बानेश्वरस्थित संसद् भवनको शंकर हलमा दिउँसो २ बजेपछि शुरू भएको बैठकमा सभामुख देवराज घिमिरे पनि सहभागी भएका छन् । 

प्रतिनिधिसभा बैठकलगत्तै सभामुख घिमिरेको उपस्थितिमा बैठक शुरू भएको संसद् सचिवालयले जनाएको छ । 

सहकारीमा भएको रकम दुरुपयोगको विषयमा छानबिन गर्न १५ जेठमा संसदीय विशेष समिति बनेको थियो । 

नागरिकको रकम दुरुपयोग भएका २९ वटा सहकारीको छानबिन गर्न समितिलाई तीन महिनाको समय दिइएको थियो । समितिको संयोजकमा एमालेका सूर्य थापा छन् । 

एमालेकै सरिता भुसाल, प्रमुख प्रतिपक्षी दल कांग्रेसबाट बद्री पाण्डे र ईश्वरी न्यौपाने छन् ।  माओवादीबाट लेखनाथ दाहाल, रास्वपाबाट शिशिर खनाल र राप्रपाबाट ध्रुवबहादुर प्रधान पनि सदस्य छन् । 

सिंहदरबारमा कार्यालय र कर्मचारीसहितको व्यवस्था भइसकेको छ ।