नेपालमा वैकल्पिक राजनीतिको वकालत गर्दै आएको साझा पार्टीले उपनिर्वाचनमा लज्जास्पद नतिजा ल्याएको छ ।

प्रारम्भिक मतपरिणामले कुनै पनि स्थानमा साझा पार्टीले जमानत जोगाउने अवस्था देखिएको छैन । साझा पार्टीले कास्की क्षेत्र नम्बर २ मा जित्ने दाबी गर्दै आएको थियो । 

नेकपा उम्मेदवार विद्या भट्टराईले झण्डै ७ हजार भोट ल्याउँदा साझा पार्टीकी रजनी केसीले १ सय भोट कटाउन सकेकी छैनन् । 

नेकपा उम्मेदवार भट्टराईले ६ हजार ७ सय ९९ र कांग्रेस उम्मेदवारले ३ हजार ९५ भोट ल्याउँदा साझाकी केसीले मात्र ६२ भोट पाइन् । 

कास्की क्षेत्र नम्बर २ अन्तर्गतको पोखरा महानगरपालिकाको वडा नम्बर २१ मा ३० भोट र वडा नम्बर ३३ मा ३२ भोट साझाले पाएको छ । 

यसअघि कास्कीमा साझाका संयोजक रवीन्द्र मिश्र नै चुनाव लड्ने समेत चर्चा थियो । 

स्थानीय व्यक्तिलाई उम्मेदवार बनाउने भन्दै साझाले नेपाली कांग्रेसकी कार्यकर्ता केसीलाई पार्टीमा भित्र्याएर उम्मेदवार बनाएको थियो । 

साझासँग एकता गरेर एक वर्षमै फुटेको विवेकशील नेपाली दलको मत झनै लज्जास्पद् छ । कमलको फूल चुनाव चिह्न लिएर स्वतन्त्र लडेकी विवेकशील उम्मेदवार जमुना शर्माले जम्मा ७ मत पाएकी छन् ।

रवीन्द्र अधिकारीले तीनपटक चुनाव जितेको उक्त क्षेत्रमा समाजवादी पार्टीले पनि अपेक्षित भोट पाउन सकेन । आइतवार बिहानसम्म नेकपा उम्मेदवारले ७ हजार भोट पाउँदा पूर्व ब्रिसिट आर्मी समेत रहेका समाजवादी पार्टीका धर्मराज गुरुङले १ सय ९ भोट पाएका छन् । 

कमल थापाको पार्टी राप्रपाका उम्मेदवारलाई पनि जमानत जोगाउन सकस पर्ने देखिएको छ । अहिलेसम्म गाइले मात्र १ सय ३७ भोट पाएको छ ।