प्रदेशसभा अन्तर्गत भक्तपुर क्षेत्र नम्बर १ (क) मा नेपाली कांग्रेसका उम्मेदवार कृष्णलाल भडेल विजयी भएका छन् । उनले १३ हजार ४ सय ४९ मत प्राप्त गरे ।

उनका निकटतम प्रतिद्वन्दी नेपाल कम्युनिष्ट पार्टी नेकपाका उम्मेदवार देवी ढकालले ११ हजार २ सय ६ मत प्राप्त गरे । यस्तै नेमकिपाका निरज लबजुले ५ हजार ८ सय २९ मत प्राप्त गरे । 

नेकपाको किल्ला रहेको भक्तपुर क्षेत्र नम्बर १ को (क) कसरी कांग्रेसको हातमा गयो त ? यसको जवाफ खोज्न २०७४ सालको निर्वाचनमा फर्किनुपर्ने हुन्छ । 

०७४ को प्रदेशसभा निर्वाचनमा तत्कालीन एमालेका हरिशरण लामिछानेलाई वाम गठबन्धनका आधिकारिक उम्मेदवार बनाइयो ।

त्यतिबेला तत्कालीन माओवादीका डीपी ढकाल बागी उठे र चुनाव हारे ।

यद्यपि त्यतिबेला एउटा उम्मेदवारले अर्कोलाई बागी भन्दै लान्छना लगाउने गरेका थिए ।

गठबन्धनका उम्मेदवार लामिछानेले १२ हजार ७ सय ८९ मत पाएर विजयी हुँदा बागी उम्मेदवार डीपी ढकालले जम्मा ७ सय ८६ मत ल्याएका थिए ।

यसबाट उक्त क्षेत्रमा तत्कालीन एमालेका मतदाताको पकड कतिसम्म रहेको छ भन्ने पुष्टि हुन्छ । 

गत वैशाख ३१ गते हृदयघातबाट लामिछानेको निधन भएको थियो । 

उपनिर्वाचनमा उम्मेदवारी तय गर्न बसेको नेकपाको सचिवालय बैठकले उक्त क्षेत्रमा पहिलेका अस्वीकृत उम्मेदवार ढकाललाई बनाउने आत्मघाती निर्णय गर्‍यो, जबकि उक्त क्षेत्रका मतदाताले यसअघिको निर्वाचनमा ढकाललाई जम्मा ७ सय मत दिएका थिए भने लामिछानेलाई १२ हजार बढी मत दिएका थिए । 

वाम गठबन्धन होस् या पार्टी एकीकरण होस्, त्यहाँका तत्कालीन एमालेका मतदाताहरूले कुनै वास्ता गरेनन् ।

पहिला अस्वीकार भएका उम्मेदवारलाई नै दोस्रोपटक चान्स दिएपछि यस्तै हुने नेकपाका एक केन्द्रीय कमिटी सदस्यले बताए । 

सचिवालय बैठकले डीपी ढकाललाई उम्मेदवार बनाउने निर्णय गरेपछि भक्तपुरमा नेकपाभित्रको विवाद उत्कर्षमा पुग्यो ।

पूर्वएमाले पक्षले जिल्ला पार्टी कार्यालयमा तालाबन्दी नै गरिदियो । यो मुख्यतः व्यक्तिप्रतिको रुझान थियो ।

पार्टी सचिवालय बैठकको निर्णय नमानेर पूर्वएमाले मतदातालाई भड्काउन केही तत्वहरू सक्रिय रहेका देखिन्थे । 

अन्ततः स्थिति झडपकै सन्निकट पुग्यो । यसले नेकपाको चुनावी अभियानलाई नै प्रभाव पार्‍यो ।

पार्टीका शीर्ष नेताहरू पुगेर जतिसुकै एकताका पक्षमा भावनात्मक भाषण गरेर फर्केको भएपनि त्यहाँका पूर्व एमालेका मतदाताहरूलाई रिझाउन सकेनन् । 

अन्तर्घातको सिलसिला यतिमै सकिएन । 

डीपी ढकालका चुनावी अभियानका एक सहयोगीले भने, 'ठाउँ-ठाउँमा पैसा बाँडियो, माओवादीलाई भोट नहाल्ने भनेर ठूलो अभियान चलाइएको थियो । पार्टीभित्रैबाट यत्रो ठूलो अन्तर्घात होला भनेर हामीले सोचेका थिएनौं ।' 

आफूसँग अन्तर्घातको प्रमाण रहेको जिकिर गर्दै उनले त्यो आवश्यक ठाउँमा देखाउने बताए । 

भक्तपुरमा अन्तर्घात हुने आशंका नेकपाका कतिपय नेताहरूले पहिल्यैदेखि गरेका थिए ।

अहिले कांग्रेसले जितेपछि अन्तर्घातको परिणामलाई लिएर टाउको ठोक्नुको विकल्प नेकपासँग रहेन ।