सुर्खेत – नेपाली कांग्रेसका नेता चन्द्र भण्डारीले आगामी महाधिवेशनबाट पार्टी नेतृत्व फेरिने बताएका छन् ।

बुधवार बिहान नेपाली कांग्रेस सुर्खेतले आयोजना गरेको कार्यकर्ता भेटघाट कार्यक्रमलाई सम्बोधन गर्दै उनले सधैं एकता–एकता भन्ने तर व्यवहारमा अनेकता देखाउनेलाई महाधिवेशनबाट किनारा लगाउने बताएका हुन् ।

‘सधैं एकताको नारा फलाकिरहने र पार्टी नेतृत्वमा एकै जना बस्ने परिपाटीको अन्त्य गर्न जरुरी छ,’ उनले भने, ‘जसरी पुराना मोबाइलहरू हामीले बदल्दै आएका छौं । त्यसरी नै हामीले नेतृत्व पनि बदल्न जरुरी छ । नेतृत्व नबदलेसम्म देश बन्दैन ।’

उनले महाधिवेशनबाट मिल्नेलाई नयाँ नेतृत्वमा ल्याइने र नमिल्नेलाई हटाउने गरी अघि बढेको जानकारी दिए । ‘अहिले पार्टीमा ठेक्कापट्टा प्रवृत्ति हावी भएको छ,’ उनले भने, ‘देश बनाउन सबैले समान अवसर पाउनुपर्छ । सबैले समान नेतृत्व पाउनुपर्छ । अनि मात्र पार्टी बन्छ, देश बन्छ ।’

नेता भण्डारीले प्रधानमन्त्री केपी शर्मा ओलीले सरकार चलाउन नजानेको भन्दै आलोचना गरे । ‘नेपालको कहिल्यै नगुमेको स्वाभिमान होली वाइन खुवाएर समाप्त पारियो,’ उनले भने, ‘हेर्दै जानुस् ओली नेतृत्वको सरकारले केही काम गर्न सक्ने छैन ।’

पूर्वअर्थमन्त्री तथा नेपाली कांग्रेसका नेता डा. रामशरण महतले देश बनाउन कांग्रेस आवश्यक भएको बताए । ‘हाम्रो नेतृत्वको सरकारले विगतमा जुन विकास र समृद्धिको रेखा कोरेको थियो,’ उनले भने, ‘त्यसलाई पूरा गर्न कांग्रेस आवश्यक छ ।’

नेता महतले नेपाली कांग्रेसकै कारण देश आजको अवस्थामा आइपुगेको दाबी गरे । ‘हिजो २०४८ सालमा उदार अर्थनीति ल्याउँदा यिनै कम्युनिस्टले विरोध गरेका थिए,’ उनले भने, ‘तर आज तपाईंले ल्याउनुभएको नीति सही छ भनेर उनै कम्युनिस्ट भनिरहेका छन् ।’