काठमाडौं – संयुक्त राष्ट्रसंघको सुरक्षा परिषद्ले जम्मु–कश्मीरको विशेष दर्जा खोस्ने भारतीय कदमका बारेमा शुक्रवार बन्द कोठामा चर्चा गर्ने भएको छ । 

सुरक्षा परिषद्को बहालवाला अध्यक्ष पोल्यान्डले यस मुद्दामा चर्चाका लागि शुक्रवार समय तोकेको हो । 

हङकङमा १० हप्तादेखि चलिरहेको विरोध प्रदर्शनको मुद्दा पनि संयुक्त राष्ट्रसंघमा चल्न लागेको छ । सूत्रहरूका अनुसार, हङकङका विषयमा संयुक्त राष्ट्रसंघले महत्त्वपूर्ण बैठक बोलाउने निर्णय लिएको छ । 

सुरक्षा परिषदमा कश्मीर विषयमा चर्चा दुर्लभै हुने गर्छ । पछिल्लोपटक सन् १९६५ मा सुरक्षा परिषद्को पूर्ण बैठकमा यसको चर्चा भएको थियो । तर शुक्रवार हुने बैठक पूर्ण बैठक चाहिँ हैन, यसलाई बन्द कोठाको बैठक नाम दिइएको छ । कूटनीतिज्ञहरूका अनुसार, बन्द कोठामा बैठक अब सामान्य हुन थालेको छ ।

पाकिस्तानले कश्मीरको विषयलाई अन्तर्राष्ट्रियकरण गर्ने कोशिश गरिरहेको छ र चीनले उसलाई साथ दिइरहेको छ । 

एजेन्सी