कर्णाली प्रदेशमा हालसम्म कोरोना नदेखिएको अवस्थामा बुधवार दुई व्यक्तिमा कोरोना संक्रमण भएको आशंका गरिएको छ ।

उनीहरूको थ्रोव स्वाब पुनः परीक्षणको लागि काठमाडौं पठाइएको स्वास्थ्य निर्देशनालयका निर्देशक रिता भण्डारीले लोकान्तरलाई जानकारी दिएकी हुन् ।

‘रुकुम पश्चिमका दुई जना ३६ वर्षीय युवाहरू सहित ३९ जनाको थ्रोव स्वावको बैशाख एक गते नमूना संकलन गरी धनगढीमा पठाएका थियौं । त्यहाँको पीसिआर मेसिनबाट दुई जनाको नमूनामा शंकास्पद देखिएकोले हामीले थप परिक्षणको लागि काठमाडौं पठाएका छौं,’ उनले भनिन्, ‘उहाँहरू होम क्वारेन्टाईनमै बस्दै आउनु भएको थियो । उहाँहरू भारतबाट आएको १४ दिन पनि नपुगेको अवस्थामा यस्तो शंका गरिएको हो ।’  

उनले कोरोना संक्रमण भएको हो वा होइन भन्ने अन्तिम पुष्टि काठमाडौंबाटै हुने जानकारी दिइन् ।