पाकिस्तानले भारतीय कूटनीतिकर्मी जयन्त खोब्रगडेलाई प्रवेशाज्ञा दिन अस्वीकार गरेको छ । उनलाई इस्लामाबादमा भारतको कूटनीतिक सहचारीमा गरिएको नियुक्तिलाई पाकिस्तानले अस्वीकार गरेको हो । 

यस कदमले द्विपक्षीय सम्बन्ध थप चिसिने देखिएको छ । 

खोब्रगडेको नाम गत जुन महिनामा आधिकारिक रूपमा प्रस्ताव गरिएको थियो । त्यही महिना भारतले कूटनीतिक सम्बन्ध घटुवा गर्दै पाकिस्तानलाई ५० प्रतिशत कर्मचारी घटाउन आग्रह गरेको थियो । 

भारतले सम्बन्ध घटुवा गरेकोमा प्रतिशोध लिनका लागि पाकिस्तानले खोब्रगडेलाई अस्वीकार गरेको भारत सरकारको बुझाइ छ । अनि इस्लामाबादले कश्मीरका विषयमा गरेको सूचना युद्धले अन्तर्राष्ट्रिय स्तरमा खासै चर्चा नपाएपछि छाएको निराशा पनि यसैमार्फत व्यक्त गरेको देखिएको छ । 

तर पाकिस्तानले भारतीय मिसन आधा घट्दा त्यसको नेतृत्व गर्नका लागि खोब्रगडे निकै वरिष्ठ अधिकारी भएको र दुई देशबीच केही समययता खासै कुनै द्विपक्षीय सम्बन्ध नरहेको भन्दै उनलाई अस्वीकार गरेको हो । 

आफूले नियुक्त गर्ने कूटनीतिकर्मीहरूका विषयमा पाकिस्तानले सिकाउने हैरियत नभएको भन्दै भारतले समय आएपछि प्रतिशोधात्मक कारवाही गर्न सक्ने देखिएको छ । यी दुवै देशले यस स्तरमा कूटनीतिकर्मीको ​नियुक्तिलाई अस्वीकार गरेको यो दुर्लभ घटना हो । 
 

खोब्रगडेले पाकिस्तानमा यसअघि काम गरिसकेका छन् तर त्यस कार्यकालका कारण अहिले उनलाई अस्वीकार गरिएको हैन । दुवै मुलुकले आआफ्ना उच्चायुक्तलाई फिर्ता बोलाएपछि कूटनीतिक सहचारीले नेतृत्व सम्हाल्दै आएका छन् । 

भारतले जम्मु कश्मीरको विशेषाधिकार खोसेर दुईवटा केन्द्रशासित प्रदेश बनाएपछि पाकिस्तानले अझैसम्म चित्त दुखाइरहेको भारतले विश्वास लिएको छ ।